有番咁上下年紀嘅香港人，可能都聽過「窮到燶戴精工」呢句說話。不過，如果真係窮到燶，邊度仲有錢買錶，何況首富李嘉誠都係戴精工，呢隻直情係「首富錶」！
代理精工錶嘅寶光實業（084）執行董事劉德杯講，精工錶絕對唔係平嘢，佢即時除咗手上嘅精工錶做例子，白金錶身配皮帶，盛惠廿零萬。適逢今年係精工創立130周年，寶光同精工喺尖沙嘴搞咗個錶展，首日以主席身份見傳媒嘅黃創增當然要撐場。佢話嚟緊精工喺全世界都會有推廣活動，包括同西甲勁旅巴塞合作推新錶。
黃創增話，除咗精工錶有搞作，寶光旗下另一主打品牌鐵達時，雖然有一段日子冇推電視廣告，但多年嚟一直都係旗下時間廊No.1品牌，當年梅艷芳賣廣告嘅「天長地久」系列，家陣仲好賣得。黃創增話，舊年重拍鐵達時電視廣告反應好，今年底食住個勢會再拍新一輯。