繼英格蘭U20領隊伊斯迪克後，再有港足教練候任人選曝光；佢就係曾喺09年歷史性帶領港足勇奪東亞運金牌嘅南韓籍教練金判坤（圖右）！
阿Kim噚日落石硤尾探南華預備組班時透露︰「我知道香港足總家想請港隊主教練，我上星期已畀咗信足總同獵頭公司。唔敢講我係全世界最好嘅教練，但我絕對係對香港最激情嘅教練，我願意為香港犧牲！」42歲嘅阿Kim舊年12月以健康理由冇做南華教練，之後返家鄉做FC慶南助教直到家。佢話身體已經好番，亦深信自己熟悉港足係佢嘅優勢。南華足主羅傑承日前喺Blog撰文，提到個人偏好日、韓教練，阿Kim今次回歸，唔通同羅生有關？
另外，日前成功蟬聯龍騰盃嘅港隊噚日凱旋回歸，陳肇麒原本希望攞咗MVP可以幫自己轉運，點知個獎爛咗，真係唔知好嬲定好笑。