畢打街上海灘旗艦店今個月23號結業，唔好誤會，唔係生意唔好執笠，而係要開間更大嘅旗艦店上海灘Mansion。噚日行政主席雷富逸話，新舖一樣喺中環，明年春天開張，但地址未公開得。
內地大款嚟香港必定去廣東道朝聖，至於老外，一定唔會錯過去搵ShanghaiTang，家陣到明年春天，咪起碼有半年冇得去旗艦店朝拜！
推蒙古服飾系列
唔使失望，11月4日至12月31日期間，佢哋會喺中環4號碼頭天台搞間概念店（Pop-upstores），名為上海灘蒙古村，特色蒙古包喺烏蘭巴托訂做，夠晒地道，仲夠晒冬日氣氛。同時推出全新蒙古限量系列，包括蒙古袍，其中真絮長袍約6800元、茄士咩圍巾約1.08萬元、毛皮及飾物精品，都可以喺蒙古包入面搵得到。
仲可以去主席蒙古包（ChairmanGer）嘆返個海景晚餐。至於畢打行原店6樓，會裝修成上海灘Loft精品商店，今個月23號開張。
記者：張韻珊 攝影：程志遠