停緊牌嘅嘉滙投資（8172）搵咗年屆68歲嘅郭偉健任CEO。郭偉健早年曾出任政府高層，之後轉咗去會計界，90年代入亞洲電視。
講開佢喺亞視嘅歷史就精采，當年吳征入主，宣佈兩個月內裁員300人，當時做署理行政總裁嘅郭偉健就係吳征得力助手。98年底，郭偉健突然請辭，吳征戲劇性咁為佢當眾落淚。
不過，最深印象係已故嘅林百欣當年喺台灣，接受電台節目主持查小欣電話訪問，講到如果林伯重返亞視，郭偉健會唔會都一齊返亞視，點知林伯越洋鬧郭偉健絕對唔能夠返，因為佢係做得最唔好嘅一個。
亞視高層嘅恩怨由當年到家都冇停過，但郭偉健早已唔係亞視人，樂得隔岸觀火。佢離開亞視之後過檔機管局做掌櫃。家陣任嘉滙行政總裁同執董，月薪10萬，加月薪一倍嘅年度花紅，仲有董事袍金每年12萬。