情迷午夜巴黎，老婆最贊成。法國《巴黎人報》噚日言之鑿鑿報道，巴黎聖日耳門禮拜三約好碧咸會面，傾加盟嘅可能性。消息指，碧咸嫂維多莉亞舉腳贊成，唔知碧咸足球事業下一站，會唔會就係去巴黎？
潮人老婆舉腳贊成
據《巴黎人報》講，巴黎聖日耳門派代表同碧咸喺洛杉磯會面，而聖日耳門準備出兩年價值400至500萬歐元（約4,200萬至5,200萬港元）嘅合約邀佢加盟，驟眼睇呢個數唔多，不過以碧咸36歲之齡嚟講已經唔差，據講仲差唔多同今夏加盟聖日耳門嘅柏斯托尼睇齊。碧咸11月之後就恢復自由身，大把人爭，好似由前英主帥艾歷臣領軍嘅英冠球會李斯特城，就有意斟佢做助教兼球員。錢，碧咸大把，而巴黎聖日耳門總監李安納度同碧咸關係唔錯，當年碧咸外借到AC米蘭時曾經共事過，有友情分，最重要當然係老婆維多莉亞呢啲走喺時尚尖端嘅潮人，若果能夠跟隨老公去巴黎發展，唔流晒口水至奇。
銀河殘陣醒紅牛贏波
碧咸應唔應該去巴黎？查實可以問法國一代射手亨利。一個係以前英格蘭天之驕子，一個係法國一代射手，生於同一年代，多年嚟喺唔同層面比賽打生打死。禮拜二亨利效力嘅紐約紅牛，就主場贏洛杉磯銀河2:0。戰果表面係冷門，實情係銀河早已篤定季後賽資格，加埋射手當路雲唔出得，結果造就紅牛贏波，保持爭入季後賽嘅機會。碧咸同亨利相鬥多年，大家都年事已高，除非紅牛殺入季後賽而又踢出超水準，否則兩個碰頭機會未必太大，即係禮拜二可能係最後一次狹路相逢囉。
講番銀河隊長兼前線殺手當路雲，佢因為大腿傷並未隨隊出征紅牛，美國同我哋香港有時差，訊息未必可以即刻掌握，如果一早知佢唔出得，應該好多人會轉捧紅牛。當路雲呢一傷，嚟緊美國友賽洪都拉斯、厄瓜多爾，都唔使預佢囉。