大新銀行靚仔太子爺王祖興（Harold），雖然做咗行政總裁半年，曝光率有增無減，但依然唔太習慣面對傳媒。話說噚日銀行宣傳最新信用卡，Harold親身撐場，華華見到上台前佢已經好緊張，不斷「咪」台詞。上到台雖然表現淡定，但一講台詞就頻頻甩嘴，要經常貓紙。
大家咪以為Harold係二世祖，其實佢來頭唔細，律師出身，係倫敦大學國王學院法學士及哈佛大學工商管理碩士，加入大新11年，05年做執董，其間幫過蝕錢嘅豐明銀行成功止血。華華前後都見過Harold幾次，至今都攞唔到佢張新卡片。唔知佢係咪怕醜，活動一完就閃人。