港股波動，家陣「估市」隨時中伏，財經專家個個話唔識睇，咁不如望天打卦。年初財經版問咗幾位堪輿學家點睇今年港股，差唔多個個都話先升後跌。中！但實際表現較好嘅月份，個個都只係射中柱，唔中籠。
麥玲玲:今個月會平穩
好似麥玲玲，年頭估農曆八月（即新曆9月）市況大致平穩，但成個新曆9月累跌14%，係近3年以嚟單月最大跌幅。
華華問玲玲師傅點解救，佢轉口話，「今年股市最壞嘅時間係由（新曆）9月8號至10月7號。」咁即係過埋今日就一天都光晒？佢話，「今個月會平穩，但去到11月8號至12月6號就要小心。」
李丞責師傅話7至9月份係最佳投資月份，但係股市呢幾個月跌到一扑一碌噃！丞丞師傅話，農曆九月受到九紫帶動，有機會出現喜訊，年尾前有金星、月球及水星3粒吉星配合，投資意欲強，可以重建信心，個市會慢慢升。咁即係丞丞師傅所謂嘅投資好月份，係叫大家撈底？「農曆七月係第一次入市位，今次係第二次。總之農曆九月有機會撈底，係咁上下日子喇，我唔敢講再準確啲。」不過佢提醒，「農曆七月同家情況唔同，七月係慢慢向下，九月跌得急但反彈強，未必搵到入市好位，比較凶險。」
至於蘇民峰估中個市喺今年8月8號會大跌，另一個日子就係10月8日，但聽日星期六喎，咁今日會唔會跌咗先呢？蘇師傅講，「之前估低位大約萬六，星期二都已經跌到差唔多，周五應該唔會跌穿喇！」呢幾日個市好反覆喎？「唔使用玄學角度睇啦，唔升又點有得跌喎！」
蘇民峰:明年秋冬見兩萬
蘇師傅仲話，11月8日係今年最後一條分界線，「單數年，如果上半年唔升，通常下半年更加跌。明知仲有機會，我都叫啲徒弟唔好家去買貨。自己8月8日沽唔到，咪將啲股票放埋一邊，等明年秋冬有機會上返兩萬點。」
李華華
mailto:[email protected]