啪部iPhone 後樓梯打野戰

啪部iPhone 後樓梯打野戰

儘管iPhone5快將出籠,iPhone4都仲有大把軟件、配件等住出。好似剛喺TGS亮相過嘅iPhone槍架,眨吓眼香港已出現,只要啪部iPhone4落去,天台、後樓梯等現實環境即時化成戰場。望住個芒一大堆異形突襲,舉槍掃射包你High到工作壓力全消!

記者:許福合 
攝影:伍慶泉
Model:Winkie@PureModels

擷取實景玩虛擬戰場

iPhone射擊Game大多篤吓個芒就當開槍,其實打唔打中都無乜刺激感。將部iPhone啪落呢套AppBlaster槍架度,就似足揸衝鋒槍四出殺敵,個野戰Feel何止提升百倍!AppBlaster並非女人街賣緊嗰類光線槍玩具,而係靠槍上2個扳機,去對應芒前2個觸控點,只須先將iPhone放入固定盒內,每當扳動扳機,就會牽動兩支控桿去碰觸屏幕,達致開槍、放炸彈等操控,勁有諗頭。
遊戲方面,暫只得一款《ApptoyzAlienAttack》可下載,啟動遊戲後,iPhone鏡頭會擷取眼前實景,讓你自編自導一個「辦公室打老細」、又或「維園驅趕外星人」古仔都無問題。異形敵人將由四方八面湧現,你要望住iPhone個芒,一邊搵出敵人一邊掃射,絕對High爆!儘管旁人以為你Short咗,但你不妨冷笑一句:別人笑我太瘋癲,我笑他人看不穿!

■工作得悶悶哋,大可走去後樓梯,玩吓虛擬WarGame減壓。

■與常見槍枝不同,設兩個扳機作開槍及手擲榴彈之用。

■扳機會推動控桿,點選介面上子彈及榴彈發射掣。

■無子彈時,畫面會有提示,Chok吓槍就可上彈。

記住飛線免騷擾

AppBlaster適用於iPhone3GS、4同第4代iPodTouch,安裝時要留意將iPhone插上後,記得槍枝上有鎖定掣,否則殺敵時,iPhone盒好易會飛脫!而屏幕最好先將光度調到最光,這樣室外玩都可保證睇得清楚。另外iPhone在機盒內,接電話較難,建議先將電話轉駁飛線或用藍芽免提。
至於遊戲技巧,除咗考你眼明手快外,最重要如何利用放炸彈的時機,基本上是留待三隻以上才放彈,其他時間都係以子彈應付,仲要時刻注意血量,不要被異形咬死。每殺一隻怪都有分數,仲可傳送到GameCenter與世界各地高手比較。

■iPhone放置好後,緊記鎖實免飛脫。

■將屏幕亮度提升,睇得清楚。

■擲出炸彈後,前方會有光球爆起,可輕易轟殺前方異形。

■眾多異形圍攻,放炸彈一次過炸清光。

槍架:AppBlaster($580)
對應:iPhone/iPodTouch
遊戲:《ApptoyzAlienAttack》(免費下載)
查詢:JCShop(31022783)

同場加映
揸軚盤周街鍊車

iPhone上好多賽車遊戲,都係用體感方式控制方向,不過就咁揸iPhone扭,手感無論如何都差啲。最近試過iPhone軚盤AppWheel,裝上iPhone後就可開車,軚盤使用軟膠,揸上手手感都唔錯,基本上支援所有體感轉向的賽車類遊戲,不過最好是使用自動加速,如《Asphalt6》等。試玩時仲留意到軚盤大小適中,令玩家手握軚盤之時,仍然可碰觸屏幕操作煞掣、開Turbo等動作。

AppWheel($298)