港股低處未算低，一日冇利好消息，淡友仍控制大局，博反彈只會做炮灰，戰友切勿以身犯險。「空軍」日前圍剿騰訊（700）及港交所（388），前者3日瀉近廿蚊，後者上周跌穿130蚊支持後，前日100蚊都差啲穿埋！上月中如跟魏力建議沽空港交所，相信收穫甚豐。
「空軍」現時目標顯然係中資電訊股，聯通（762）周二成交金額10.51億銀，但沽空竟佔5.08億銀，比率高達48.3%，加埋周一的3.35億銀，兩日就沽空咗8.40億銀聯通，即係5600萬股！「空軍」屯咁重兵，而聯通近日先由高位回落，隨時出現「人踩人」場面。
淡友大手沽空聯通，原因甚多，先睇估值。彭博資料顯示，聯通今年預測PE竟高達46.6倍，明年預測都有23.3倍，在目前市況下，20倍PE已是「死罪」，更何況係46倍？短期內股價狂瀉3至4成，似乎無可避免。
過去半年，支撐聯通股價的主因非iPhone5莫屬，蘋果已於10月4日發佈新版iPhone4S，憧憬已炒完，股價自然要大跌。睇圖表，聯通形成雙頂回落之勢，周二以大成交跌穿8月以來上升軌，MACD熊差距擴大，後市岌岌可危。
魏力