《北上NEWS直擊》
【本報訊】大半世紀前，上海灘是萬千中國人嚮往的冒險樂園，不少人在這裏發迹，也有不少人在這裏鎩羽而歸。對香港人而言，今日的上海依然是遍地黃金的地方，只要你有冒險精神，一定不是問題。近年中港兩地交流越趨頻繁，北上工作的港人數目逐年遞增。本報在上海訪問數個在當地打拼多年的香港人，他們均認為，雖然近日內地經濟增長有放慢迹象，但上海人在購物方面依舊豪爽，只是置業態度明顯較以往審慎，「貨比三家」後才畀錢。 記者：陳韻妍
廣告公司高層 國內落地生根
曾在廣州、北京及上海三地工作的廣告公司ZenithOptimedia中國區董事總經理郭志明，不僅將工作地點由港搬到滬，更舉家遷到內地居住，「我97年返內地無耐就結婚，家太太都去咗北京做嘢，個仔都喺北京讀書，家全世界的目光都係中國，所以個仔半歲就送咗佢去北京，希望佢可以學到流利的普通話」。
從事廣告行業多年的郭志明，還記得初來內地工作，最不適應就是內地的工作文化。他指出：「內地企業是一言堂，老闆話晒事，成間公司圍住佢轉，我哋可以等佢兩三個鐘，工作時間又唔規律，試過在惠州夜晚11點開始傾合同，傾到第二朝7點，香港一定唔會發生咁嘅情況」。
主打網絡公司客戶
儘管工作文化上有差異，但他仍選擇留在上海，「中國市場大人口多，機會一定多，就算你係賣襪，都可以賣到幾億隻襪，中國家有9億人有手機，9億人喎，係美國人口的3倍，可想而知發展機會幾多」。
他指，廣告每年都有一個熱點，去年汽車及奢侈品行業生意最好，今年則是資訊網絡公司天下，如團購網，視頻網站等，很多網絡相關企業都要求幫手「執靚間公司」，上半年網絡公司佔新增生意額約50%，首批廣告費已逾億元人民幣。
他解釋，「家啲網絡公司要建立品牌，好似淘寶商城係我哋個客，但大家都搞唔清淘寶網同淘寶商城，其實淘寶網係C2C，淘寶商城係品牌店，但消費者分辨唔到，所以我哋就幫佢建立品牌形象」。
打工仔變老闆 鑽飾商樂不思蜀
99年以試探形式到上海工作，再由打工仔搖身一變為老闆，現時在上海擁有3間鑽飾店的小島鑽石島主（行政總裁）吳毅文坦言，上海遍佈機會，零售市場正蓬勃地成長，絕對是大展拳腳的好地方，即使現在有機會，也不會選擇回港工作，「對比香港、台灣、新加坡，呢度（上海）你諗到嘅嘢都有可能發生，問題係你敢唔敢」。
吳毅文指出，近日外圍經濟不穩，股市又大冧，但都沒有影響公司的生意，今年國慶仍是人頭湧湧，上海人的消費態度與以往相若，再加上臨近年尾是嫁娶旺季，鑽石、珠寶的需求特別大，故此生意反而有上升的迹象。
一個月生意額170萬
上海人消費力驚人，小島鑽石的人均消費金額亦由兩年前的1.2萬元（人民幣．下同），升至去年1.45萬元，現時更達1.7萬元。
他稱，小島鑽石店舖裝飾與上海一般珠寶零售店有很大分別，店舖傢俬及裝飾由專人設計及訂做，還設有鑽飾花甲服務，實行以幸福掛帥來吸引顧客，「內地好少人會做服務，所以我哋唔係賣產品，係賣幸福、浪漫……主打明星級服務，公司一個月生意額可達170萬元。
不過，他承認，內地近年物價飛漲，店舖的租金亦與日俱增，幸好他兩年前已簽訂5年租約，令他的租金較隔鄰店舖平近80%，除租金急升外，員工薪金亦同步上揚，「售貨員底薪約2000至3000元，但連同福利，薪金便會翻一番，加上佣金，月薪甚至高達1.2萬元」。為控制成本，他已擬好向二、三線城市拓展，今年計劃在重慶、杭州、蘇州、北京開6家分店。
高峯期擁十層樓
為了令生活更舒適，吳毅文在上海也有置業，更曾經是炒樓一族，「99年買樓，嗰時每平方米講緊三、四千蚊，家三、四萬㗎喇，我由買一個、兩個（單位），到最後買咗四、五個，當然係借錢啦，但問題係樓價有機會上升，咁你賣出去都賺到啲錢，最高峯期試過有十層樓」。
他坦言，上海樓市仍然暢旺，周一開幕的「十一假日房展會」堆滿睇樓的人，惟上海人買樓的心態有些轉變，再不是「啱心水就買」，現時大多處於觀望態度，或格價後再決定。
居滬三年 見證消費興衰
面對經濟增速放緩，股市又表現不滯，上海人雖然仍然樂意消費，但消費態度已較以前略為審慎。在上海工作3年「打工仔」馮一鳴表示，近日與上海的士司機傾談，他們均指今年十．一黃金周的氣氛比往年差很多，「打的」人數較過往為少，但可能是與的士剛加價有關，整體消費市道仍然熱烈，周街都擠滿人。
中央近年積極催谷內需，降低出口比重，目的就是減低歐美經濟放緩的衝擊。事實上，歐美經濟自金融海嘯後一直低迷，令中國出口業苦不堪言。
馮一鳴指，近年內地出口市場一直沒有起色，他有朋友做童裝出口批發，今年生意額顯然較去年遜色，股市大跌亦令生意更差。
業主身家厚拒蝕錢賣樓
儘管中央去年以來不斷出手打壓樓市，但上海樓市表現仍然堅挺。他稱，雖然近月樓市成交淡靜，但上海樓價「冇乜點跌」，主要因為賣樓的人身家豐厚，故即使中央出手打壓樓價，他們寧願等兩至三年才出售物業，也不願劈價出售，總之他們以300萬元買回來的樓，不會以300萬元賣出。
馮一鳴認為，相對香港，上海的租金及消費未算很貴，以同樣的價格在港滬兩地租樓，無論是可選擇樓盤數目及質量，滬都較港為多及佳，以過往在香港碧海藍天租一個600呎單位為例，租金要1.4萬港元，惟上海一個700呎單位只需6500元（人民幣．下同），故上海租金仍可接受，惟自住單位租金已由原本4000元，上升至6000元。
