星期日中午到沙田馬會凱旋廳飲茶，諗住可以順便睇埋二時四十分嘅日本短途馬錦標賽，賽前日本評馬人一致睇好新加坡代表「火箭人」，香港代表「天久」，我地臨場落注，亦係咁睇。馬主N，亦在座飲茶，之後入馬房觀察馬匹喎，佢話中山競馬場跑千二米短途，最後二百米係上斜路，恐怕「火箭人」唔習慣，放唔到，估計高雅志會留番一段力，而「天久」排第一檔，容易俾日本馬焗死，所以兩隻熱門馬唔夠穩陣。左丁山話：「唔係啩，『火箭人』有噴射前速，應該一出閘就搏命放，扯散咗，啲日本馬未必焗得住『天久』，『天久』可搏後勁沿欄直上。」
點知道，真實出賽版本一如馬主N估計，左丁山未免諗得太天真，高雅志死蠢，果然一出閘就留住隻馬唔搶放，死跟在第三位，到最後五十米無力衝刺，「天久」沿欄後上之際，日本馬三號「三人共舞」嘅騎師竟然故意將馬頭扯向內欄阻住「天久」，窒住佢，日本馬十號「衝鋒駿驥」在中間直上取勝，日本人為咗贏馬，夾手夾腳打茅波，贏得幾肉酸，此乃日本人保護主義之具體表現，一於團結對外。唔好以為日本人嘅工作效率好高，呢場有隻十三號馬「加登快駒」衝閘，跑足三個圈，竟然無儀仗馬攔截，任由隻馬跑到疲累自動返入馬房方面，先至見成班人衝埋去拉實隻馬！
日本馬其實質素甚高，與外地馬有得跑，但長期閉關自己人玩晒，始終妨礙進步。去年林大輝議員隻「極其妙」贏短途馬錦標爆大冷，由頭放到尾，純粹係因為日本人防住「綠色駿威」，睇唔起「極其妙」之故。我地香港就真係國際城市嘞，夠晒體育精神，國際賽排位抽籤，一切公開透明，香港騎師唔准賽前互通策騎指示，香港騎師有南非、澳洲、法國、紐西蘭好手，練馬師亦然，一切開放，故此香港賽馬可達致世界水平，受國際尊重。日本保護主義唔係話唔掂，但近年已無晒創意，只能食老本，新力輸俾徒弟三星就係一個警號！