黃金貴，沉香更貴；沉香中嘅極品棋楠，矜貴程度媲美鑽石。藏有唔少沉香佛像、雕塑工藝品嘅簡文樂，今個月將部份珍藏公開展覽，八方噚日先睹為快。
沉香有價，簡文樂噚日介紹珍藏時小心翼翼，身穿白袍戴上白手套，先向八方介紹高10呎、全世界最高嘅沉香佛像。佢唔肯透露價值：「家一克沉香貴過同重量黃金，相信呢尊佛像喺體積同價值上都係世界之最。」佢冇詳述佛像來歷，只係話好多藏品購入時狀態唔好，「今次展出前要做好多修補，唔好殘殘舊舊咁畀人睇啦」。
撫金絲棋楠悟人生
自言收藏沉香幾十年嘅簡文樂，不談藏品價值、來歷，只講因緣。佢翻出一塊木頭，雙眼發光同八方講：「呢塊金絲棋楠，係鎮山寶，我都未決定展唔展出，唔捨得拎出嚟。」此金絲棋楠重396克，簡文樂稱原屬一個年逾80歲嘅日本藏家，因為其後人冇興趣收藏，佢先有機會買入。「我𠼮咗十年八年先買到。後來先知道，個日本人喺香港買呢嚿棋楠，我又買返嚟香港。」
日本參照梵文稱沉香為「伽羅」，簡文樂名下有匹馬叫伽羅，可見佢對呢塊金絲棋楠幾咁重視。日夜愛撫呢啲稀世奇珍，簡文樂悟出人生哲理。佢指樹木受傷分泌樹脂療傷而成沉香，係一種「靠自己」克服困難、危機嘅天性，做人都應該有呢種耐力，「做人遇到困難，都要靠自己修行，先至有成就」。佢又話其實香港有好多優點，可惜好多人唔識貨，「俾人當爛木，其實好多人羨慕我哋。」
建議港府廣種沉香
香港之名，據說同沉香有關，為咗發揚呢種沉香性格，簡文樂稱曾建議特區政府廣植沉香，「五百年、一千年後，有啲嘢留低畀子孫。」除咗收藏沉香，簡文樂仲藏有好多香水、香油，其中一個上世紀40年代Hermès男用化妝箱，佢向八方介紹咗兩次，堪稱愛不釋手，「鱷魚皮造，有水晶香水樽，樽蓋銀造鍍金，家再向Hermès訂，都唔肯同你做」。
mailto:[email protected]
佛像展次次撞正股市跌
07年同09年，簡文樂先後借出珍藏嘅觀音同文殊菩薩佛像展覽，今個月13日至30日喺大會堂舉行嘅展覽，同康文署合辦，展出沉香佛像同工藝品共幾百件展品。三個展覽都係以「祥和」做主題，三次展覽之前，都遇上股市大跌甚至金融風暴，八方問簡文樂，係咪想藉展覽佛像普渡眾生，打救沉淪股海小市民？簡文樂哈哈大笑，「純屬巧合，如果我知道個市咁，一早沽空咪發達！」實情發明中文傳呼機嘅簡文樂早就發咗達，佢話收藏沉香，與人分享先有真樂趣，「香味係冇得收埋欣賞嘅，以前皇帝點起沉香，唔係佢一個人享受，身邊文武百官都聞得到」。
出名老襯捨得交學費
簡文樂曾把爛木當沉香，圖中左邊係真正高棉沉香，右邊係「雕出嚟嘅爛木」。佢話做收藏家，「交學費」係平常、必然嘅事，「喺收藏界我都幾出名係老襯，因為唔係幾講價，買錯嘢又唔嘈」。
