今個月踏入40歲嘅朱茵，喺噚日率先收到勁爆嘅生日禮物，佢憑港台電視劇《沒有牆的世界之第三選擇》入圍第39屆國際艾美獎最佳女演員，到時會同瑞典女星露美慧柏絲（NoomiRapace）同埋演過《哈利波特》嘅女星茱莉溫達絲（JulieWalters）齊齊爭獎。
朱茵噚日佢喺牛池灣見記者話：「我喺度發緊夢，今日接到電話入圍，晒頭有咩提名，呢部戲舊年喺芝加哥電影節已攞過銀獎，再有提名好開心，自己好似一嚿雲，好彩家有舞台劇排緊，唔係胡思亂想太耐就折磨我，有提名已經係中獎。」
開心流淚
而男友黃貫中聽到女友獲提名後自爆差啲喊出嚟，佢為女友抱不平咁話：「以前啲人叫佢性感靚女，兩個字就講完，對佢唔公平，我以前都覺得佢係靚女唔識做戲，但睇住佢進步，今次提名已經好似得咗獎咁，總之我有運行，女友開心最大得益就係我，到時我一定會陪佢出席。」朱茵噚日聽到男友大讚佢時，佢哽咽話：「我第一個打畀佢，佢陪我行咗好多路，總之大家見到面乜都唔講就嚟個大擁抱。」