名畫家黃永玉作品受追捧，噚日蘇富比秋季拍賣會，一幅於80年畫嘅《駿馬圖》，起拍價4萬蚊，叫咗兩三口價已去到9萬元，有神秘人透過電話叫價20萬元，但競爭者眾，之後每口2萬蚊嗌上去，最終32萬元成交，連同拍賣佣金總額40萬元，比原先估值4萬至6萬元高出達九倍。
呢幅畫有黃永玉書寫「不若相忘於江湖」七個字，配以一隻躍動嘅馬，原本由著名大收藏家葉承耀醫生所有，佢捐出嚟拍賣，籌款支持英國牛津大學興建中國中心。噚日慈善拍賣嘅古董及字畫共37件，但僅15件成交價高過賣家同意出售下限，其餘未到價收回，包括估值150萬元至200萬元嘅乾隆「御製明黃緞地繡雲蝠花卉金龍紋吉服袍」，起拍價100萬，但叫價到140萬就停。整個拍賣活動扣除開支後，共籌得211.6萬元。