《成報》隸屬嘅星美出版（8010）周圍撲水續命，但其最大條水喉─《成報》名譽主席楊家誠捲入官非，條街數隨時收唔返，頭痕嘅債主惟有作出減值準備。
據菱控（8009）嘅通告，喺楊家誠擔保下，自09年10月至去年5月三度向《成報》合共借出950萬銀。由於楊家誠牽涉洗黑錢案，因此公司要作減值準備。今次可以話首次有債主公開《成報》嘅街數。
翻查放數嘅菱控，楊家誠並無牽涉任何股權或董事職位，通告亦無披露佢同主席邱恩明或者其他董事有任何關係，又無提到3筆貸款有任何抵押品，單靠楊生個人作擔保，關係的確非比尋常。