新政府總部聲稱「門常開」，係咪名副其實大家有眼睇，立法會新大樓美輪美奐，可惜有啲嘢，新不如舊。以往市民去立法會登記姓名，就可以坐上公眾席旁聽；以後想旁聽立法會，登記手續都好簡單，不過公眾席前面卻有塊大玻璃，日後如果再有人喺公眾席抗議示威，議員官員都可以充耳不聞。
霍震霆晨早模擬開會
不過畀貴賓坐嘅VIP旁聽席前卻冇大玻璃，而且VIP席平日不開放，一般市民冇機會坐入去旁聽會議。立法會應該係代表民意機構，家陣有塊大玻璃隔絕市民聲音，又有個特權「包廂」，點講，都唔可以話有進步。
為恭迎煲呔，立法會噚日舉行模擬會議，平日罕有露面類似活動嘅霍震霆，竟然朝早8點左右準時到場，扮開會時更做戲做全套，響起投票鐘聲時，喺議事廳走上7樓嘅議員辦公室，再落返去投票，實地測試5分鐘內能否趕到投票，結果係得嘅。