【我哋有嘢講】「我以為佢以後都行得比人慢，最後佢跑得比人快」；一把低沉的聲線、一個活生生的故事。
這是近日電視熱播、個個話好睇的「幸福」廣告，主角是蘇樺偉媽媽。沿用「萬寧妹」廣告創作班底，蘇太今次粉墨登場，有機會繼「萬寧妹」後成為「最受歡迎女主角」；但她志在的，是6位數字酬金，幫補家計。記者/攝影：徐嘉華 部份相片由Metta提供
09年曾引起全城會心微笑的「萬寧妹」金句：「我有少少鍾意咗佢」，連蘇媽媽都有睇：「我有睇，個妹妹仔好得意，好得香港人心。」「萬寧妹」與「幸福」都是廣告公司Metta兩名四眼佬Hardy（林啟基）與Teddy（梁子安）創作，「萬寧妹」王允祈09年拍攝時5歲、蘇媽媽阿貞58歲；8月拍攝廣告前一天，蘇媽就像5歲小孩，緊張到睡不着。
拍廣告前緊張到失眠
「拍廣告前一晚，我一秒都冇瞓過，驚拍得不好、又怕出來效果不好、又怕自己唔靚、又怕情節會俾人笑，整夜都好擔心。」蘇媽不知道的，原來Hardy同Teddy兩年前已「睇中」她；事有湊巧，09年蘇樺偉接拍飲品廣告，正好又是兩人傑作。Hardy說：「那次蘇媽媽陪偉仔拍廣告，她站得遠遠的、默默睇住個仔，支持個仔，是好典型的舊式母親；今次接拍『幸福』廣告，我們即時想起蘇媽媽。」
問到可有想過像「萬寧妹」般拿廣告界的「最受歡迎女主角」，蘇媽說：「諗都冇諗，我呢世人都冇諗到自己會拍廣告；過程好享受，最大收穫當然是有錢啦！可以幫補家用，拉上補下。」不足一分鐘的廣告中，交代了蘇媽如何湊大一出世就有黃疸病，隨之而來痙攣、雙耳弱聽、口齒不清兼腦麻痺的偉仔，每天背着他返學放學、上落樓梯；之後14歲被田徑教練發掘，16年來累積6面殘奧金牌。
一家四口靠兩子賺錢過活
廣告拍了4、5個小時，無論獨白、音樂及畫面都觸動人心；當中最觸動當事人蘇媽的，是廣告替身背住小孩行樓梯：「偉仔6歲前住在深水埗唐樓，那6年間，每逢落雨天，我又要背着他、又要擔遮、又要揹書包，想起都想哭，百般滋味在心頭。」
觀眾在廣告看不到的，是蘇媽26歲時誕下偉仔後，因要時刻照顧連車衣工作也停了；蘇爸02年當油漆工人時跌斷腳，至今也沒工作，蘇家四口就靠偉仔及22歲的細佬賺錢過活。
以為蘇媽會怨天尤人，但她卻套用廣告中最後一句「原來幸福一直冇離開我」：「唔幸福我點生到兩個仔，老公又對我好好，兒子又孝順，這就是幸福；以前的經歷，你說苦又不是，上天要你經歷這一劫，就冇得避，其實人人年輕時都捱過。偉仔給了我一個好驚喜的人生，帶給我好大榮譽，其實上天好眷顧我，我好滿足了。」
後記：幫偉仔搵老婆
偉仔今日30歲牛一，問蘇媽可有想過偉仔有天結婚生仔，她說：「我又冇所謂，若他這一生沒姻緣命，跟着我們也冇所謂；若他想找老婆，或者會找朋友幫手介紹女仔也說不定。」蘇媽爆料，原來不少女生曾約偉仔出街，暫時只是襄王無夢。
廣告精華
拆解廣告背後秘密
「幸福」廣告雖然一分鐘也不夠，但感動人心；其實片中有不少「隱藏位」，你看得出來嗎？
《大揭秘1》
黑白相另有其人
廣告一開始，蘇太第一句說話：「我叫阿貞。」名是真的，但手持的後生相卻不是她本人。
《大揭秘2》
旁白不是蘇太
蘇太也有錄到旁白，導演最後卻選用配音員那個版本，但聲線與真人十分相似。
《大揭秘3》
小童不是蘇樺偉
為求逼真，導演真請了一位輕度痙攣的小朋友，扮演童年時的蘇樺偉。
《大揭秘4》
不是愛民邨的家
廣告中的「家」其實是一間醫館，並不是蘇樺偉現居愛民邨300多呎的
廣告片： http://www.youtube.com/watch?v=q1lw58oYXsA