車費有可加可減機制，講求靈活性嘅車款，要求都一樣。三菱旗下嘅農夫車王牌L200Sportero，雖然唔係玩車價加加減減，而係玩升升降降，不過唔係講避震，而係尾斗嘅蓋冚有唔同升降角度任你調校，最緊要係原來萬幾蚊嘅蓋冚家隨車附送，中正熱愛Outdoor後生仔女嘅死穴。
記者：趙慧敏
攝影：譚盈傑
Model：Winnie@GME
尾斗蓋冚三部曲
三菱正為L200車主提供優惠，隨車附送尾蓋蓋冚，唔單止免費送畀車主，蓋冚更好玩到極。事關蓋唔係一般揭開閂埋咁簡單，在彈弓臂支撐下，蓋冚可以水平線升起又或45度角揭起，將架車停泊喺郊外，坐喺車斗吹吓風都唔怕曬親。雖然靈活性夠強，不過都要講句公道話，由於蓋冚並非油壓升降，所以升起放低時，都要出番多少氣力，的骰女士可能要搵人幫手！
巨型尾斗加冚保護
以前揸農夫車，俾人以為要經常出入地盤，但今時今日嘅農夫車，似乎與潮人畫上等號！且揸得農夫車出街，相信是玩戶外活動嘅忠實Fans，事關超巨型尾斗，任你擺放上山下海嘅架生都可以。如果尾斗放咗部幾萬蚊嘅單車，揸車出街日曬雨淋，一定好肉赤，所以裝番個蓋冚似乎唔少得。不過家唔少車斗蓋冚郁啲都過萬銀，仲要係普通嘅揭開式，如果雜物太高身，擺放時都有唔少問題。
加電鍍飾件添潮味
雖然農夫車行緊商用車牌，不過確實有唔少人將它當私家車用，外觀自然要講究，但法律上要在分隔車斗與車廂嘅玻璃窗配上鐵絲網，避免載貨後行車時將玻璃窗撞爆，家多得個蓋冚，可以踢走個鐵絲網，外觀上確係加分。另外L200Sportero擺明吼住年輕人市場，車身用咗唔少閃到行嘅BlingBling電鍍飾件，例如鬼面罩及車身兩邊側鏡等。雖然代理推出L200Sportero已一段時間，但一直只試過自動波版，家有機會與手波版會面，由四速自動波箱換上五速手波，雖然兩者最高輸出都係136匹馬力，不過在斜路表現顯得更加剛強勇猛，且扭力不俗，雖然是一輛2,850kg嘅龐然大物，卻沒有意料中的笨重感。手波版好玩之餘，仲有一個抵字，事關與自動波版比，平足$50,000，係咪着數大家心中有數。
MitsubishiL200Sportero
引擎：2,477cc直四柴油Turbo
傳動：五前速手波四驅
馬力：136ps/3,500rpm
扭力：314Nm/2,000rpm
售價：$279,900
查詢：27211111（環宇汽車）
