中國人最忌橫樑壓頂，事關會影響健康，但係外國人都好少理，其中NFL球星奧祖辛高（ChadJavonOchocinco）仲誇張到擺一大缸魚喺床頂同埋床嘅兩邊。奧祖辛高會唔會周身病我求大俠就唔清楚，淨係知道如果佢頭上嘅魚缸爆咗，佢真係會好大鑊！
「一瞓低望到啲魚」
NFL球星奧祖辛高可能不為香港人熟識，但係佢對養魚嘅狂熱，可能喜歡養魚嘅香港人亦略有所聞。效力新英倫愛國者嘅奧祖辛高，喺自己位於佛羅里達州嘅屋企，養咗好多缸魚，更有一個魚缸係裝喺自己嘅床頭，個缸仲要係呈拱門形，等自己一瞓低都望到啲魚，感覺好似係海底一樣。
呢位33歲嘅美式足球員話佢未婚妻EvelynLozada亦非常滿意呢個設計：「佢對眼總係望着嗰啲魚。」另外，佢嘅客廳亦有一個特大魚缸，喺魚缸前有3部平面電視，等呢位球星喺唔睇電視嘅時候，亦可以欣賞自己心愛嘅魚。
迪祖咸姆頓最愛狗狗
奧祖辛高呢個意念係就係出位，但萬一個魚缸啲玻璃爆咗或者漏電，隨時連命都冇，所以我求大俠認同佢好有創意，但就唔多認同佢呢個行為。
除咗奧祖辛高，網球「1哥」迪祖高域同埋NBA嘅咸姆頓亦係「寵物男」，將動物融入自己生活嘅一部份。迪祖球技出色，但原來佢嘅秘密武器唔喺網球場上，而係喺觀眾席。喺比賽大部份時間，佢嘅貴婦狗Pierre都會坐喺佢女友身邊為主人打氣。
但可惜喺今夏嘅溫布頓網球賽，賽會禁止小動物進場；就算之後佢要求賽會允許，佢嘅寵物亦不得進入。迪祖友人話：「佢唔能夠帶隻小狗入場，佢真係好失望。對佢嚟講，隻狗真係好重要。」可能「1哥」化悲憤為力量，喺最後勝出賽事，贏得獎盃。由此可見，Pierre真係對迪祖嘅原動力。
效力底特律活塞嘅咸姆頓，相信亦會好同情迪祖；皆因佢都將狗當成最好嘅朋友。呢位33歲嘅老將表示自己從細到大都好喜愛養狗：「我係喺一個喜愛狗嘅家庭長大，小狗係我嘅好朋友。」佢有4頭鬥牛犬，而且生出來嘅小狗都會送畀朋友。咸姆頓解釋佢對狗情有獨鍾嘅原因：「因為狗係人類最好嘅朋友。」如果有《老友狗狗》有外國版，迪祖同咸姆頓都大有資格做馬浚偉嘅角色。