歐美同大陸經濟接連爆鑊，港股可謂四面楚歌，博反彈難過登天。內地水緊，財富效應消失，濠賭、珠寶股已連日Freefall，係時候到消費零售股。嘢唔可以唔食，但鞋可以買少幾對，龍頭百麗（1880）市佔率5成，零售點1.3萬個，市值成千億，「大笨象」嘅身軀，經濟好就無堅不催，經濟差就變炮灰！
百麗「海嘯價」係2.50元，但家仲有12蚊，兼且只係回到年初水平，肯定未跌夠。假設下半年盈利係上半年50%，全年約賺30億人仔，以PE為20倍計（其實應該更低），股價只值8.50元，即較現價12.82元仍要跌3成。
大股東上月初出貨，更係一大凶兆，加上基金接貨審慎，批股反應甚差，以下限價15.28元都只係沽到2.4億股，仲要當日一開市就跌穿配股價，好有散水Feel。近日沽空比率高達兩成，後市有排捱。
公司一路賣中高檔鞋款，但一線城市接近飽和，令百麗如早年李寧（2331）一樣，開始出現銷售「瓶頸」情況。中期業績顯示，存貨由48.6億升至52.3億人仔，下半年經濟轉差，情況料更難改善。若開拓低檔產品，又會拖低毛利率，認真頭痕。
魏力