【本報訊】港股跌瘋了，恒指失守萬七關，全城淆底！恒指第4季首個交易日埋單大跌770點（4.38%），收報16822點，主板成交763億元。投資者爭相掟貨，面對大跌市，豈只散戶損手閉翳，基金一樣輸到眼坦坦。
大市昨日屍骸遍野，投資者要錢唔要貨鬥快掟貨套現，逾1700隻股份中，逾1100隻股份下跌，568隻股份創1年新低，223隻股份跌幅一成以上，當中不乏散戶基金愛股，當中以濠賭、零售等板塊最傷。博反彈的散戶一再陪葬，昨日共有53隻牛證被強制收回。港股市值跌至15.4萬億元，為09年9月以來兩年多新低。
藍籌中，除煤氣（003）、電能（006）、太古（019）及思捷（330）力保不失，大部份均遭重創，19隻藍籌挫逾半成，其中平保（2318）、華潤置地（1109）及中國海外（688）瀉逾一成，是表現最差3藍籌。
港股未止瀉，經紀鄭先生坦言，「歐洲問題實搞唔掂，雖然德國勤力，但希臘、意大利大食懶，傾唔埋實會爆煲，一爆煲就會拖累美國，跟住全世界都無得走。個市實仲有得跌，只係睇唔到會跌幾多，所以而家無人敢買，得個睇字，好多人等撈貨，咪可能等40幾蚊時執和黃。」
一位紅衫女士亦在街頭哭股喪，「而家聽到投資已怕怕，早前曾經大額損手，蝕咗成幾千萬，都唔知係咪俾人呃。好似嗰時話買賣黃金，呢頭入咗錢買，過幾日就話蝕晒，總之我唔識呢啲嘢，而家咩都唔會再買。」
基金重傷 沽得就沽
基金一樣輸到怕怕，一本地對冲基金經理坦言，近兩個月損傷慘重，跟不少行家一樣已經沽得就沽，現在手上只有約兩成股票持倉，並不是味兒說：「家個市閒閒地跌六七百點，跌一成股份通街都係，跌半成股票已算跑贏大市！」大行亦睇淡後市，瑞銀財富管理研究部亞太區主管浦永灝稱，外圍形勢未明朗，後市估計仍有10%至20%下跌空間。德銀策略員同意，全球金融市場面臨最大風險將是歐洲，若歐洲不推出穩定措施，市場將繼續潛行。
波動市況下，證監會亦提醒投資者，在參與槓桿或孖展交易時，中介人無責任發出追繳保證金通知，投資者可能被強行平倉。
最壞情況仍未出現
海通國際中國業務部副總裁郭家耀表示，外圍存在多項不明朗變數，現在市場更開始憂慮中國經濟硬着陸，大市反彈動力欠奉，機構投資者寧持現金，料洗倉潮持續，恒指若下試16000關口不感意外。富昌證券研究部總監連敬涵估計，恒指周內隨時見16000點，該水平會有較明顯支持，惟內地信貸問題剛浮面，最壞的情況仍未出現，港股難言見底。
歐美股市昨晚早段偏軟，主要藍籌在美國預託證券（ADR）反覆。
《散戶心情》
嫌錢腥先會入市
經紀張先生
「23000點時已經睇淡，家基本上走晒貨。個世界咁多炸彈，始終會爆一個半個，嫌錢腥先會入市。家係等佢爆咗之後，個市又掟到阿媽都唔認得時，先再玩過都唔遲，暫時惟有等小反彈就沽期指，因為實有錢賺。」
蝕晒海嘯後賺幅
市民黃先生
「工作關係唔方便買港股，本身有投資基金，但股市係咁跌，已經蝕咗好多，都唔知應該點做，惟有睇定啲先……蝕嘅程度係講緊海嘯至今2至3年累積嘅賺幅，喺一個多月內化為烏有之餘，仲要倒蝕，過去3個月已經冇買貨。暫時睇到11月，唔得嘅就全部撤退。」
《基金意見》
萬六水平分注買
英業環球資產管理董事總經理陳炳強
「基本因素衰梗㗎啦……落到呢個水平，比較多傾向takeprofit，睇好嘅投資者唔多，空倉補完無真正買盤嘅話，反彈比較細。萬六如果守得住，反彈上去係萬九又頂住㗎啦……有現金嘅，萬六水平可以買，但買一部份啦，分開入。」
估唔到個底喺邊
豐盛金融資產管理董事黃國英
「正路策略應該等好轉先買都唔遲嘅，因為你估極都唔知個底喺邊嘅，譬如今日（周一）的濠賭股。」至於目前是否值得中線買入持有股份？「家已經好瓜得啦嘛。睇估值無乜意思嘅，因為有好多revision（調整預測）嘅機會嘛，revision可以好低……。」
