被老實宅男封為新一代女神，事實上糖妹一啲都唔老實！作為唱作人，唱K練歌無可厚非，但點解一入房就有堆歌排住隊畀佢哋唱？原來兩兄妹對Apps勁有研究，靠部iPad錄音、打機之餘，仲可出術隔空入定歌仔，連搵Romote插歌呢啲老土動作都慳番，出街唱K梗無蝕底。宅男們，老實地說句：很想要吧！
記者：韓繼聰
攝影：伍慶泉
揀定歌入房即唱
有人話「做嗰行厭嗰行」，問糖兄妹會唔會平時唱歌唱得多，冇乜興趣唱K呢？鬼馬糖妹即時搶答：「唔會喎，K房個Feel都唔同，又可以唱吓人哋啲歌，冇咁悶。」說罷已即時起勢狂唱。一街都係iPhone同iPad，各大商戶爭相推出自家Apps，撈娛樂嘅Neway就醒，率先推出點歌App，糖兄妹作為K場常客，即時扮專家介紹：「無論你喺街又好，等緊K房又好，只要用呢個App就可以揀定歌仔、編輯埋個List，入到K房輸入啟動碼就即刻有歌唱！」
糖兄仲醒：「個App入面有個『我的iTunes』功能，曉自動偵測iPad、iPhone入面嘅歌，聽開嘅歌一點即播，好方便㗎。」呢個App仲有個手寫搵歌功能，寫歌名或歌手都得，快過平時數筆畫多多聲！
《Neway任你點》
（iOS，免費）
iPad當Remote 偷講我愛你
除咗主打嘅選歌功能，App仲可以當埋Remote用，插播、停播、重播樣樣有齊，以後就唔使爭Remote用喇。嫌呢啲功能都係碎料？App仲可以俾你打字喺屏幕上播放。「生日快樂」、「我愛你」乜都得，總之iPad打字，電視即播，啱晒怕羞仔用嚟傳情達意玩驚喜！糖兄妹就即時示範打咗句「ILoveSugarClub」支持吓自己先。
兄妹玩盡Apps
作曲好幫手
玩咗唱K新App，糖兄妹平時最常用又有咩Apps呢？原來係跟機預載嘅錄音App。「平時一有作曲靈感，就即刻用iPhone錄低佢，甚至夾Band、唱Demo都係靠佢，而且音質都算唔錯。」
《語音備忘錄》
（iOS，免費）
糖兄喪玩卡Game
除咗音樂，糖兄同一眾男孩一樣鍾情打機，而當中最得佢歡心嘅就係《ShadowEra》。糖兄興奮咁介紹呢個CardGameApp，話可以對電腦之餘，亦可以上網同人對戰，戰術變化多端，好刺激！
《ShadowEra》
（iOS，免費）
糖妹出街靠港鐵
糖妹雖貴為宅男女神，但原來出入都係搭港鐵。「呢個App可預知幾耐車程，仲教埋我邊個出口最近目的地，容易啲掌握時間。」宅男聽完後，大可多啲搭港鐵扮邂逅。
《MTRMobile》
（iOS，免費）
