泰維斯嘅罷踢事件依然係球迷茶餘飯後嘅話題，曼城日前出招，話由於球會正就事件進行調查，所以唔俾泰仔返阿根廷，一於困住佢喺曼城，同領隊文仙尼作困獸鬥。另一邊廂，阿根廷名宿馬勒當拿就開口撐同聲同氣嘅泰仔，仲叫之前公開撐文帥嘅曼聯領隊費格遜收聲。
讀唇專家解讀證罷踢
泰仔呢單嘢，連國際足協都話關注，曼城自然要做啲嘢喇。泰仔原本諗住上個禮拜五返阿根廷避吓風頭，點知曼城唔俾佢走，要佢乖乖咁留喺曼市等候調查。外國有報章就用自己嘅方法偵查呢件事，佢哋搵咗讀唇專家，解讀泰仔當時講咗乜嘢；有報道話，佢當時咁同助教講：「唔得！唔好理我。我已經講過，唔得！」如果讀唇專家解得啱嘅話，理虧嘅就係泰仔。
據報，如果證實到泰仔真係罷踢，佢會被罰停賽8個禮拜兼冇糧出。佢一個禮拜人工有25萬鎊（約303萬港元），停兩個月就唔見咗成200萬鎊。仲有，文仙尼已經將佢永久踢出一隊，據悉泰仔最想曼城同佢解約，等佢自己搵下家，但曼城當然唔會俾佢奸計得逞，打算要佢踢足3個月預備組，當係懲罰；到下年1月轉會窗開，先至將佢賣走。據聞俄超新貴馬哈奇卡拉率先表態，話想買佢返嚟拍伊度奧攻堅。
泰仔其實未爆出罷踢事件前，已好唔得曼城球迷歡心，因為自從佢今夏話想離隊後，球會內部人士話佢件波衫喺近10個月，都未發過市！而隊友米卡李察士日前成為第一個公開插佢嘅曼城球員，話佢拒絕落場絕對係唔啱。
肥馬撐泰仔叫費Sir收聲
另外，泰仔事件亦引發名宿領隊口水戰。曼聯領隊費格遜早前力撐文仙尼做得啱，點知，阿根廷球王馬勒當拿日前就即刻幫自己友，叫費Sir收聲，話人哋家事就唔好好似三姑六婆咁加把口。肥馬越講越扯火，仲踩埋爵爺咁多年嘅成就：「費格遜唔應該評論呢件事，因為佢之所以做到個成功嘅領隊，都係全靠有班好球員啫！」嘩！雖然你肥馬貴為球王，但橫睇掂睇呢句嘢都冇乜邏輯，想幫人都要用吓腦啦。