有骨氣！咪誤會我求大俠收咗人水，喺開始天冷同火煱店賣廣告，講嘅係麥卡倫有骨氣；佢明知救唔番諾定咸森林，而間球會莫財，索性唔博人炒，自己鬆人，一毫子都唔使人賠。
10戰8分排英冠尾4
如果話麥卡倫做教練唔掂，根本就唔係新聞，不過佢今次冇賴死，真係有骨氣。呢位前英格蘭領隊，近年一直唔能夠擺脫令英格蘭踢唔到歐國盃決賽周嘅污名，雖然前季幫川迪贏得荷甲冠軍，叫做威過吓，但去到德甲禾夫斯堡就打回原形；今季回流英格蘭，「降格」教英冠隊諾定咸森林，好快就知上錯賊船，會方根本唔撥錢畀佢擴軍。以麥卡倫能力，加埋人腳有限，同隊波累鬥累。
諾定咸森林喺禮拜日對伯明翰場聯賽，明明由唯一叫做有狀態嘅伊斯美米拿入波，領先1:0，但喺最後15分鐘內連失3球而輸1:3，開季10戰得8分排英冠尾4，衰到貼。消息指，麥卡倫並唔係因為呢場敗仗而劈炮，早喺上星期五，佢已經叫停兩個借將，擺明一早唔想玩落去。
森林喺聲明中表示：「球隊輸畀伯明翰後，麥卡倫向主席杜比表示呢個決定，呢次離任唔需要賠償。杜比亦宣佈打算季尾辭去主席一職，家立即着手搵新領隊。」好明顯，喺呢隊波唔想玩落去嘅，唔止麥卡倫一人；已經領導球會10年嘅杜比意興闌珊，話就話會繼續領導隊波到季尾，但擺明對球會前景唔樂觀，更何妨跑慣江湖嘅麥卡倫；查實如果麥卡倫衰格啲，可以頹落去等人炒，到時有錢賠，但佢並冇咁做，淨係呢一點，都算頂天立地。