泰維斯因為要俾人查而唔返得阿根廷，但有位曼城球員就喺9月中就嚟咗香港探親。究竟邊個球星嘅屋企人住喺香港！原來係曼城英文名叫SeanTse嘅年輕中堅謝嘉強（圖）。
佢喺twitter透露自己喺上個月中嚟過香港旅行，話好鍾意呢個地方。佢喺香港同阿爺阿嫲見過面，仲話兩老送咗部MacBookAir畀佢，好開心。不過，最令香港球迷驚喜嘅係，佢有可能代表香港隊！有網友喺twitter同佢講，話香港隊需要佢，而謝嘉強回覆話，好希望有朝一日可以為香港隊上陣！早前就有網民懷疑謝嘉強係香港人，看來佢同效力漢堡嘅林志堅（前譯林智健）一樣，可能係香港人嘅仔女。
謝嘉強現年19歲，擁有中國血統，喺英國出世，曾經踢過愛爾蘭U17。佢細個嗰陣考過曼聯同曼城嘅青年隊，但冇人收佢；佢並冇放棄，繼續喺地區聯賽踢波，最終獲得曼城睇中。喺07年成功加盟曼城青年軍，今季仲加入埋曼城歐聯嘅B隊名單，意味着佢有可能喺歐聯上陣㖭。