喺大牢度日嘅國美電器（493）創辦人兼大股東黃光裕，最近又發功，上星期二公佈，話要同國美成立合營公司，沾手低迷嘅內地房地產。市場狂轟國美不務正業，瑞信上星期五降級削價踩多腳，搞到單日暴跌兩成二，計埋周三嗰日股價下挫，兩個交易日累跌26%。
其實，近年國美股價起跌，驚險過海洋公園部「越礦飛車」，背後故事情節亦精采過電視劇，多次爆出股東同高層糾紛，股價幾乎次次都插水。
股東糾紛 股價多數冧
追溯返08年，黃光裕捲入經濟犯罪案之後，國美股價大瀉，停牌近7個月。前主席陳曉擔起大局，引入貝恩資本做第二大股東。不過，人心不足，試圖透過增發股份，攤薄黃光裕持股量，觸發股權紛爭，股價就係咁舞高舞低。
今年3月國美請咗業內備受尊重嘅張大中出山，做非執董兼主席，暫穩大局。遇上中期業績唔差，張大中高調接受傳媒訪問，試圖利用公關力量，挽回投資者信心，股價終露曙光。點知黃光裕唔生性，動作多多。話晒檔國美都係黃光裕創辦嘅，究竟佢喺度諗緊乜，真係要問佢自己至知。
mailto:[email protected]