「匿名分析」（AnonymousAnalytics）喺網上發放質疑超大（682）嘅報告，搞到超大復唔到牌兼延遲公佈業績。一舉成名當然吸引「高登起底組」注意，有報道話，佢哋係互聯網黑客組織「匿名者」（Anonymous）新成立嘅部門，《金融時報》喺網上同佢哋做咗個訪問，當問到點解由政治搞到私人企業，佢哋就話，係畀同樣由「匿名者」支援嘅「佔據華爾街」（OccupyWallStreet）示威行動啟發。
匿名分析話，市場對好多示威、抗議行動反應唔大，惟有影響到股價，市場先留意。佢哋話，希望可抽出下一個馬多夫。
金融市場從來都係向錢看，影響到股價先會觸動班華爾街大鱷神經。唔信？你睇「佔據華爾街」示威行動已經踏入第三周，換來係紐約市警方大規模拘捕，班大鱷就繼續安坐大班椅。