搞鬼組合「福祿壽」王祖藍、阮兆祥、李思捷同埋苟芸慧、官恩娜（Ella）、江欣燕等人，噚日喺東港城為無綫新劇《荃加福祿壽探案》舉行「新潮偵探異能現身」宣傳，女主角汪明荃有嘢做所以出席唔到。
無綫今晚搞台慶亮燈儀式，即係代表正式踏入台慶月，視帝視后嘅新聞將會炒得更熾熱，為咗配合宣傳，「福祿壽」得到「『豉』帝組合大獎」，祖藍即刻話：「我決定讓畀馬浚偉！」
官恩娜梳起唔嫁
事後「福祿壽」話將獎讓畀馬浚偉、陳豪同黃宗澤，祥仔講笑咁話：「公司可能到最後，見我哋三個冇乜殺傷力，於是將個獎畀我哋，到時冇人嬲。」思捷都認同：「係呀，最多咪嬲一晚。」
講番套劇，今次苟姑娘同祖藍係一對，不過就冇咀戲，苟姑娘大叫好彩，因為佢話要咀好朋友李亞男嘅男朋友，感覺好尷尬。提到近日有女星閃婚，一身媽姐打扮嘅Ella話自己梳起唔嫁，不過只係一日咁多啦！