香港仍喺殖民地時代，就流傳呢種講法，「實際統治香港嘅係馬會、怡和、滙豐同港督。」可見怡和喺香港地位幾咁舉足輕重。不過，家陣香港都回歸14年，睇怕新一代都唔知怡和有幾巴閉。無啦啦講起怡和，係因為以往喺香港勁過港督嘅怡和大班，將會換班！
怡和控股常務董事（即係CEO）黎定基明年3月會改任非執行董事，大班個位由新加坡怡合集團董事總經理衞柏文．凱瑟克接棒。衞柏文98年入怡和集團，先後出任怡和太平洋財務董事同CEO，07年加入董事局成為執董，近年喺東南亞業務方面貢獻唔少，今次得以更上一層樓，實在可喜可賀。
凱瑟克家族唔只委任衞柏文出任常務董事，同時仲委派艾特．凱瑟克做副常務董事，跟衞柏文同一日履新。