謝婷婷和安志杰拍拖以來，一直視他為結婚對象，更多次傳出婚期。婷婷昨日踢爆原來向來甚man的安志杰，其實好怕未來外父外母謝賢（四哥）和狄波拉，安志杰一見兩人就陰聲細氣，更不敢向兩人提親怕屆時會緊張到標汗。
近期香港女星掀起閃婚潮，莫文蔚、郭羨妮、梁詠琪輪住出嫁，令到一眾女星的婚期都成為關注目標。謝婷婷和劉浩龍昨日在尖沙嘴出席聯合國兒童基金會活動，婷婷和男友安志杰（Andy）一拍拖就爆出訂婚、結婚消息，兩人愛得癡纏兼甜蜜，經常情侶檔搵錢。
望有求婚驚喜
婷婷昨日談到近期的女星閃婚潮時說：「我都好多朋友呢兩個月結婚，佢哋有分享男友點求婚，我聽到都希望有呢啲surprise。」不過，婷婷坦言就算男友Andy無驚喜，一樣會嫁給他，因為她已經認定男友為終身伴侶。
提到Andy有否求婚？婷婷笑住踢爆男友最怕向四哥、拉姑提親，她甜笑話：「佢話最怕向我父母提親，佢話到時要披毛巾、戴住headband，因為一定緊張到狂流汗。」
大爆兒時趣事
婷婷續說：「每次Andy同爹哋媽咪見面，佢都好緊張，爹哋一定搭住佢膊頭話：『Beaman！』，你知爹哋幾咁man，而媽咪就梗會掃佢背話：『做乜成日講嘢咁細聲？』好好笑！」問到可會和男友閃婚，婷婷說：「唔會，因為應承過大家，我結婚係會公開話畀大家聽，同埋都想大家戥我開心。」
此外，婷婷又自爆小時候在加拿大過萬聖節，扮白雪公主卻被迫穿冷衫打底的趣事，又指哥哥謝霆鋒穿蜘蛛俠裝，比她有型得多。
採訪、攝影：盧妹
