古仔古天樂早排以8600萬沽咗何文田豪宅京士柏山獨立屋。間屋成四千幾呎，又喺九龍傳統豪宅區，夠豪又夠星味，所以華華一直索料，睇吓邊個接貨。答案終於揭盅，原來係上市公司錦興國際（2307）主席戴錦春同埋佢太座、錦興執董張素雲。
話說政府田土廳噚日登記咗間屋嘅買賣資料，戴錦春同張素雲兩位新主人嘅名字曝光。兩位都係錦興國際執董，錦興主要從事成衣製造同埋貿易業務。
兩人今趟買屋，雖然唔知係投資定自住，但家陣時勢，揸磚頭可能冇揸股票咁膽戰心驚。
查實古天樂喺2002年同2004年，先後兩度買咗兩間何文田豪宅京士柏山獨立屋，家清貨，兼且兩件都有斬獲，投資眼光獨到。