王喜與無綫結束了16年賓主關係，近日王喜在now的節目大爆去年夜探捲入涉貪案的陳志雲後，即被無綫雪藏，更由男主角變成閒角，王喜直言要多謝那個原本可能想侮辱他的人，令他變得更謙厚及消除了傲慢之心。
王喜離開無綫後，最近接受了陳貝兒主持的now102觀星台《E+Focus》節目訪問，王喜更首度披露去年夜探陳志雲後，遭雪藏18個月及被逐出TVB的真相。
主角變大茄
去年陳志雲捲入涉貪案，王喜一直不離不棄，王喜接受now訪問時，被問到之前有份演出的無綫處境劇變成了80集閒角，是否與陳志雲有關？王喜似不是味兒說：「呢個係不可多得嘅訓練機會，係畀我去修忍辱波羅密，verygood！」
王喜解釋忍辱波羅密是佛法有一個訓練，是訓練人接受及怎面對侮辱，他更大爆：「當你面對一啲你覺得被侮辱嘅機會唔好放過佢，將佢視為一個課堂，就正如2010年3月11號陳先生被指貪污遭拘捕，12號晚我同另一位演員都已經喺陳生返屋企之後即刻上去探佢，由嗰日開始我已經喺男主角系列被out走。」
王喜又指，陳生那時被停職，亦產生了一大堆問題，好像他由10年3月開始已沒有劇拍，在四處打聽下，王喜得悉歐錦棠因做白內障手術辭演了無綫處境劇《天天天晴》中的苟老闆角色，王喜爭取到後，卻只有「食咩呀？」、「飲咩呀？」這些對白。不過，王喜卻說幸好有這個機會，讓他將其傲慢之心摧毀，變成很卑微，變成一個臨時演員，甚至沒台詞或只是捧餐的演員。
「多謝侮辱」
自言甫入行已當男主角的王喜，從未做過閒角，並語帶暗示說：「我覺得好好喎，喺我臨走最後一個電視演出要我做一個茄喱啡，我覺得出得嚟行，預咗要還，終於還一嘢啦，所以我資歷就會豐厚啲，我可以同人講捱過冇對白嘅角色……我好多謝嗰個俾苟老闆我做、原本可能諗住想侮辱吓我嗰個人，多謝佢，因為佢唔畀呢個機我嘅話，我可能已經係更加傲慢，更加自大嘅一個人。」未知王喜暗示的人，是無綫的高層樂易玲，還是《天》劇監製徐遇安？
撰文：林妃
