隔牆有耳：招親船P　港女呻冇得晒身材 - 李八方

移民英國嘅港男PeterLau，喺英國林肯市招親招到見晒報。佢近排返咗香港開派對搵女朋友，朋友噚日為佢搞咗個船河party，透過facebook搵咗十幾位女士上遊艇玩，希望畀多啲機會佢哋同Peter相處，互相了解。點知強烈熱帶風暴尼格唔通氣，呢個時候接近香港，天文台掛起一號風球，影響咗成個party。

怕醜得來好鬼可愛

成班後生仔女堅持上船玩，不過隻遊艇就出唔到海，只係停喺碼頭開P，改為飲吓酒食吓嘢，玩吓啤牌咁聯誼。有出席嘅女仔同八方講，原本帶晒比堅尼戰衣諗住騷吓身材曬吓太陽，最終都用唔着。
有份去船P既女子都對Peter讚不絕口，讚佢怕醜得來好鬼可愛。有位23歲嘅女子話，之前睇蘋果動新聞已被Peter吸引，噚日第一次見面更對佢大加印象分，好希望有機會同佢約會加深了解，又宣稱願意跟Peter去英國生活喎。
Peter就話，噚日咁多靚女上船，莫講話對邊個靚女有好感，連佢哋啲名都未必記得晒，佢希望可以同佢哋見多幾次面喎。距離10月中蘭桂坊嗰個正式尋找女朋友大派對嘅時間越來越短，Peter要加把勁啦。