中超勁旅廣州恒大提早奪冠，相信全靠恒大地產（3333）主席許家印嘅獎金政策。話說，季初廣州恒大推出「513」獎勵計劃，所謂513，係指贏一場比賽獎500萬蚊，平手打和獎100萬，輸一場就罰300萬。正所謂「重賞之下，必有勇夫」，所以目前為止，廣州恒大只係輸過一場，26輪比賽累積獎金達9400萬。
重提舊方案 平手冇獎金
原來之前許總嘅獎勵計劃，唔係咁筍㗎！據內地傳媒報道，恒大原先嘅方案係「505」，即係贏就獎500萬，平手冇獎金，輸就要倒扣500萬。不過，教練李章洙認為513合理啲，所以最後用咗513方案。
舊年內房賺到盤滿缽滿，當然可以豪使一啲，但係今年中央不斷打壓樓市，金九銀十冇咗影，好多內房都要減價去貨，恒大CEO夏海鈞更講明9、10月好難有理想成績。球隊呢啲使錢宣傳嘅嘢，當然慳得就慳。不過，今年提早贏咗中超聯，明年自然心雄想攞埋亞冠盃同足協盃，要做三冠王，獎金唔少得，但又要慳，咁點？所以新一季球季，之前嗰個505方案再被重提。各位球員想有獎金，真係許勝不許敗！
李華華
mailto:[email protected]