唐唐辭官引發新一輪音樂椅，林D9成功上位接任政務司司長，連帶D9系人馬譚志源也上位，接手政制事務局局長空缺。今次人事變動之所以引人談論，係今屆政府已近尾聲，D9升任第二把手好大機會順利過渡到下一屆政府，變成大權在握的權臣。而譚志源也搶先一步成為下屆局長人選之一。
外邊主要插D9民望低殘，在爭鬥風眼位政制事務局任職多年，夾喺中央同香港人之間，早已成身箭，民望低而掌高位，只會為政府惹來更大麻煩。芸芸局長中，表現硬淨民望高的首推好打得嘅林鄭月娥，有傳媒社論為「好打得」抱不平，認為煲呔撐D9而放棄好打得令人費解。
輸在只顧個人民望
煲呔見記者一番說話，其實已講出了原因，CS係做政策統籌，協調不同政策局，主持政策委員會審議各政策局提交建議，所以要係TeamPlayer，10個AO，9個會認為D9比好打得優勝，所有跟過D9嘅人都會大讚佢係好老闆。相反好打得對外就好掂，政治形象好到加零一，尤其傳媒普遍認為好打得敢於抵抗地產大孖沙。但對內就好麻麻，上手常秘楊立門同佢互片，主動要求調走。
至於「僭建門」風波，佢只顧自己政治形象，擺出不畏權貴姿態，不承認自己轄下屋宇署過去對付僭建物執法有漏洞，一般市民容易跌入陷阱。結果上至特首唐唐下至普羅市民人人中招，一場僭建風暴打到政府灰頭土面。講起好打得當時置身事外，一派事不關己姿態，官場中人至今仍然好鬼嬲。
一個坐喺火山口多年任勞任怨，一個眼中只有自己，如果你係特首你會點揀？煲呔當日講嘅一番表面聽落幾「無厘頭」嘅理論，表面係讚揚D9，表示為官者要愛香港做實事，不可以一心只求民望，但官場中人聽落就認為煲呔另有所指。好打得之所以好打得，由始至終係得力於煲呔背後全力支持，每有內部爭拗都撐行佢，不斷將發展局坐大，久而久之，好打得變成眼中只有自己。好打得相信至今仍不明白，點解會係D9，唔係自己。
睇吓黃仁宇《萬曆十五年》一書，寫明朝人人稱頌模範官僚海瑞一章，應有所領會。
添馬男