大市於季結日弱到不堪，歐債問題惡化下，唔排除部份基金都信心崩潰，於季結前「沽得就沽」，有錢賺就計數，留多啲Cash應付贖回。舉例說，惠理基金重倉的華晨中國（1114）及恒大地產（3333）上周五重挫一成以上，濠賭股及珠寶股更加係洗到「片甲不留」，統統唔見一成。10月睇嚟都係凶多吉少。
強勢股遭洗倉，有隻弱勢股卻逆市彈起，就係雨潤食品（1068）。先旨聲明，魏力唔認為雨潤已見底，但8月以來累瀉70%，必有反彈，以黃金比率計，即使做個最弱的0.236倍反彈，已可見11.50元，現價吸納水位超過三成，小注買博賺一成，並不過份，跌穿7.50元止蝕。
雨潤上半年多賺23%至16.09億元，但第三季就發盈警，公司賴係傳媒負面報道所致，但大股東出貨呢？應不能推說是受傳媒影響啩！食品安全出問題，生產成本又上漲，公司基本因素轉差係事實。不過，股價咁殘，即使以下半年盈利倒退五成計，雨潤全年仍賺24.14億元，按年跌11.5%，每股盈利1.32元，現價PE僅6.3倍，兼有近5厘息，有條件反彈。
魏力