Prius加V　7人坐享低碳生活

政府近年十分落力宣傳低碳生活，經常呼籲市民食飯要多啲人一齊、洗衫儲多啲先開機，甚至乎睇電視都最好同隔籬屋組個電視團，聽落確實唔容易。想低碳？豐田全新推出的PriusV絕對攞足100分，Prius的Hybrid油電混合動力已經夠環保，仲要擠多兩個人落去變七座共享資源，真係夠晒抵又夠晒低碳啦！

記者：許維雅
攝影：蔡家輝
Model：Betrys@GME

想呼籲市民善用資源過低碳生活，的確難一步登天，香港充電配套不足，又叫人點用電車呢？所以慳油排放低的油電混能車相對較被大眾接受，好似Hybrid車始祖豐田Prius就最受環保車主愛戴。亦正因如此，當日本豐田傳來Prius將會變身七座PriusV後，唔少車主都有興趣換走油費貴馬力大的傳統七人車，加入環保一族。其實豐田代理皇冠早前已經運抵一部PriusV到港，還預計於年尾或出年年頭正式發售，不過見坊間迴響如此熱烈，亦急不及待開車讓傳媒先體驗。
外形跟Prius如親兄弟的PriusV，最亮眼的分別就是身形脹大了一個碼，長闊高達4,615×1,775×1,575mm，車身不但拉長了155mm以便加插多兩個座位，流線型車尾設計令新車風阻系數低達0.29Cd。

■拉長流線車尾，風阻系數低達0.29Cd。

■錶板畫面設定跟Prius有啲唔同，少了電池狀態圖案顯示。

■輕觸式屏幕揀歌選台方便就手。

■全新大圓按鈕可旋轉亦可向左右推調控。

雖然新增的後排座椅跟PriusV的七人車身形一樣迷你，腳部伸展空間有限，比較適合女生或小朋友坐，但總算坐多兩個人。豐田的油電混合動力系統絕對係最得車主信賴的成熟代表，PriusV沿用第三代的Hybrid系統，1.8公升引擎配合電動馬達同步推動，總馬力輸出有136匹，車主更可因應路面的不同情況去選擇EV/ECO/POWER三種不同慳油程度行車模式，平均綜合油耗為17km/L，以現時油費$16.45計，每公里油耗都係$0.96。

■摺合中後排座椅，可換來971公升儲物空間。

■尾廂板下暗格夠晒深，可放不少雜物。

■放了電池，手枕下的儲物格空間不多。

■後排座椅旁邊12V電插方便後座乘客。

■變種藍色mouse形小波棍係Prius車系的標記。

PriusV最亮眼的地方是全新設計的鋰離子電池，不單止比之前更耐用，尺碼細了又移到前排兩座之間，令尾廂有200公升儲物容量，配合中後排座椅可靈活摺合，最高可騰出971公升，令內櫳空間運用更實際。之前有聽聞電池移位的目的係增加安全性，減低電池置於車尾被撞的機會，但皇冠銷售發展副經理Jacky就澄清：「PriusV車架經過強化後必定有十分堅固的剛性，電池改放前座，主要係方便散熱同埋為後座帶來更多空間。」

雖然正式發售價格仍有待遲些揭曉，但預計售價應約$500,000。雖然好多車主都對呢部環保七人車好有興趣，但50萬車價確實嚇窒唔少人。

湛生：「我有留意佢，因為都想換部七人車，加上慳油又環保，一直想試。若果車價係40萬頭，反應一定熱烈好多，不過50萬我都覺得會有人買，我會考慮。」

蔡生：「油價越來越貴，改揸混能車係好事，雖然50萬好似貴咗啲，但為環保都值得。我就希望等遲啲車款多啲競爭大啲時，車價低番啲先買。」

引擎：1,798cc直四VVT-i配同步電動馬達
馬力：99ps/5,200rpm（油電混合動力總輸出136ps）
扭力：142Nm/4,000rpm
傳動：CVT無段變速
預計售價：約$500,000（發售日期待定）
查詢：28801455（皇冠車行）

Prius加V 7人坐享低碳生活

Prius加V　7人坐享低碳生活