唐英年卒之宣佈辭職，話放吓假先，但未正式講到要參加特首選舉。香港選舉法例對競選經費嘅限制好嚴，銀碼唔夠大之餘，仲要由參選人宣佈參選之日起計，於是人人都曉得諗縮數，日日扮係「疑似候選人」，非到正式報名參選日期，都係唔宣佈參選。但今時今日，梁振英與唐英年、葉劉淑儀還不是做緊競選活動？如果唔係，佢地做緊乜？法例雖嚴，畢竟還是死物，可以被人取巧。
好嘞，唐公子辭職，梁兄雖講明佢已出席咗最後一次行政會議，葉劉淑儀又話佢會盡量爭取支持，睇嚟雙英競技已成定局，葉劉搞亂檔啫，泛民嗰邊，何俊仁應該粉墨登場啦，唔參選就笨。點解呢？一位政界人士話俾左丁山聽，一千二百名選委之中，佢相信泛民都會搵到足夠票數提名一位候選人，但絕對唔夠票贏到選舉。不過，無論唐或梁亦因此無法在第一輪投票就取得六百零一票（除非中央下令西環吹雞數夠六百零一票），而需要第二輪投票，唐梁兩人對決，屆時泛民選委投向那一方就變得好關鍵，又或者葉劉如果真係參選嘅話，佢亦可以扮演同樣角色，情況就好似日本民主黨在第二輪投票選出野田佳彥做首相一樣。
根據外國經驗，AB兩人相持不下，C君持有少量游離票嘅話，便立即成為爭取對象，可以開出高價，價高者得，價唔係講錢，而係講政治，譬如泛民可以開出「全民退休保障、抽畢菲特稅、最高工時」之類要求，睇吓唐還是梁會答應。泛民在特首選舉中，可以明輸實贏，好考驗何俊仁與泛民嘅政治手腕，最後一着就係搵唔搵到一個「必敗勇士」參選。
唐梁陣營相信已在思量攻防策略，部署不同境況，挺梁之劉夢熊既在北京講到中央未有祝福任何人，或我地可以暫時假設唐未數夠票，泛民選委票有機會可以左右大局。正因如此，未到明年選特首之前，先做選委係兵家必爭，選情空前激烈，真係一票不能少。