人人都八卦疑似特首馬面候選人單緋聞，細莊反而有興趣探討一下女AO普遍嫁唔出，或者糾纏喺不倫關係呢個問題。於是，星期日就約咗任職傳媒嘅前AO朋友食下午茶吹吓水。
朋友仔同細莊講，考得AO，人工高、福利好、晉升機會又比其他公務員優勝，擇偶要求自然超高。一般打工仔或普通公務員佢哋唔會考慮。結果，好多女AO都會以AO同事為首選對象。不過，呢堆女官本身好有「主見」，加上讀得書自然靚女極有限。
多以經濟作考慮
另外，男AO自己亦有條件，自然唔一定屈就，加上萬一女方升職快過自己亦好尷尬，因此可以唔揀女AO就盡量唔揀；會刻意同AO同事配對嘅，好多都係以雙方嘅經濟作考慮，十分唔單純！
細莊忍唔住又問，私人機構都有唔少叻人，啲女AO揀圈外人唔得咩？朋友咁樣回應：「我年薪過百萬的話，我媾女明星啦！」明晒！所以，呢班女AO只好寄情工作，而一無所用嘅感情，有時就會投射到上司身上囉！
細莊對此有啲唔服氣，朋友話，其實都有例外。年前負責賭博政策女高官屬少有靚女AO，有唔少前度都係男AO，包括自認「橋」多嘅處長。佢最終情定有大少之稱嘅圈中靚仔。大少目前已離開政府去咗公營部門，不過增添佬味嘅大少，據說越嚟越受女士歡迎，太太都十分頭痕。
逢周一刊出