一場大病，喚醒了張可頤，一個重生的張可頤。
05年張可頤事業如日方中，卻不幸患上甲狀腺炎，病情一發不可收拾，全部工作被迫喝停。可惡的，是病情影響情緒，張可頤變得生人勿近；可悲的，是她每日要戴着口罩頭耷耷四出尋醫，過着不敢見人的黑暗日子；可喜的，是張可頤經過人生的低谷之後，她比以前活得更快樂。42歲的張可頤，比起24歲的張可頤，活得更可愛，更如意。 撰文：楊潔雯
跟病魔打了一場硬仗之後，張可頤明白「放」是很重要，她說：「一隻手大極都係得5隻手指，執到好緊、死都唔肯放低、唔肯放開嘅話，可能多過5隻手指嘅嘢你根本攞唔到。」
大病後漸蛻變
青春期的張可頤，無論生活、工作、事業、愛情，都好像一個爆旋陀螺，不停地拼、不停的撞，一落場就全力拼搏。42歲的張可頤，已經不會再用死力去搏，她說：「有好多人以為我病咗咁耐，真係好慘喇，休息咁多年，又停晒所有工作，家返出嚟，又要追番晒啲人氣。其實我一啲都唔慘，我冇呢段時間，我冇呢個思維，我冇家呢種積極，以前我用嘅係死力去拼，家我係要將健康同生活模式水平平衡得好好，以最佳狀態出現。」
張可頤口中形容那個過氣張可頤，是個固執、緊張、不容易相信人、對身邊人非常嚴厲的管家婆，她說：「以前我好似隻母雞，乜都要管，好執着，只識得一味做，又殘又瘦，仲以為自己好得，嗰時近睇真係千瘡百孔。經過一場大病，我想做一個新嘅張可頤，以前睇嘢得一個角度，家闊咗好多，無論幾有壓力、幾緊張，我都要學識寬容、學識講笑、識得放低，所有嘢都係nobigdeal。一張相啫、一件衫啫、一個頭啫、一個妝啫，今次唔靚下次好鬼靚咪一樣。家希望各樣嘢平衡，條路咁樣會舒服得多。」
努力抗戰三年
本來是一個普通都市病甲狀腺炎，但張可頤發現時，已到達頂峯，好似火山口噴發出的熔岩一樣，一發不可收拾，她說：「我去到好嚴重嘅地步，要即刻食心臟藥，不停食藥。荷爾蒙多到令我瞓唔到覺，唔使食嘢、好精神，但心跳比平常人快好多，個人好暴躁、好唔安樂、好神經質。之後一食西藥，個樣仲好似變咗另一個人咁，個size變晒。」
長達三年的艱苦抗戰，張可頤堅持每日進行各種治療，每日過着冇面見人的日子。張可頤堅強，詳述痛苦經歷的時候，聽不到半句怨言：「連落街買嘢都戴口罩，好急咁耷低頭走返屋企。每日咁過，仲要睇醫生，十一點、一點、四點、夜晚，做氣功、lock頸、西醫、針灸、推拿，所有朋友嘅建議我都試。」
訪問期間，多次提到「唔怕冇嘢食最驚冇靚衫着」，張可頤愛靚，聽得出！當年由一個可人兒，突然變成眼凸兼肥腫難分的病人，實在難接受，更何況她是觀眾心目中最受歡迎女藝人，她說：「有個高人同我講，話我算好堅強，如果我稍為軟弱啲，都可能自殺咗。當時我遇到宗教，又仲有少少運，去到谷底，總有貴人出現扶一扶，精神上、物質上、金錢上、工作上，嗰段時間我終於捱過咗。」
緊張的情緒影響工作，工作壓力影響健康，同時影響社交能力和人際關係，這是個骨牌效應，張可頤說：「以前搵到錢都好唔滿足，每個月又要搵幾多十萬，股票、基金又要供，但越諗越煩，越諗健康越失。」
悔與宣萱不和
大病後，人生路更闊，張可頤痛改前非。當年跟宣萱鬧不和，搞到水火不容。如歷史重演，《難兄難弟》的寶珠、芳芳又可不可以做到一對好姊妹？她說：「其實嗰時我同佢冇特別相處過，好姊妹？如果一個未變嘅張可頤未必會，一個變咗嘅張可頤放番落當年個位置，係絕對做咗好姊妹好耐。」張可頤變了。
看淡紅塵
在印象中，張可頤長情，從來不拍散拖，董波8年，陳容森6年，愛情對張可頤來講，是麪包，是每日都需要吸收的碳水化合物，張可頤以前是這樣想：「病嗰時我冇拍拖，係呢方面冇乜好大啟發，不過家係理智咗，唔會依戀一樣嘢，無論係愛情或者其他，就算失去都唔會有太大打擊，可以講係化咗，睇淡紅塵，唔知係好事定壞事。」
女人40，需要的不是激情，或許一段淡淡而恒久的感情，來得實際。可頤跟現任男友曾安邦拍拖兩年，她說：「係09年開始，朋友關係幾好，唔會太激進，安然自在，好舒服。」
不再計劃
病，令可頤失去預算，從那天起她不再計劃，包括結婚，她說：「我對婚姻仍然有憧憬，有緣份相識，好好享受，但拍拖又唔係包結婚、包幸福、包生仔。等時機成熟，要結就會結，冇人知，今日幸福少奶奶，唔包你一定唔離婚，係冇保證。」可頤有點悲觀，但她卻認為自己是進入「化」境。
自嘲老油條
年少氣盛，張可頤把握每個表現的機會，搵到錢，又有名氣，代價是瞓不安，食不落，更糟糕是賠上健康。09年病癒復出，今日可頤不會用死力去拼，她說：「家拍《法證先鋒III》、《女人最痛》個個劇都好開心、好舒泰、好安樂、好放低。同黎耀祥好夾，因為大家喺呢行都浸咗咁耐，好識得點樣就，今次再合作，佢都話我變咗！」
當視后張可頤遇上視帝黎耀祥，又會有甚麼火花？張可頤說：「過往同祥仔合作過好多次，今次首次做一對，好多嘢都點到即止，就連對戲，大家都識留力。我哋兩個就好似老油條，好有默契。」
讚祥仔多元化
祥仔默默耕耘多年，近年扶搖直上，張可頤相信每個人的路不同，她說：「好深刻記得祥仔同梅小惠喺《香港人在廣州》做內地人，祥仔扮羅文又得，到近期《天天天晴》做醫生，佢係好多元化，到家就好似有道氣場，邊個時候都唔夠家好，真係啱啱好！」