iPhone4雖然可以拍片，但真係齋拍，有無Effect玩吓㗎？今日介紹嘅幾款iPhone拍片Apps，叻過內置單調到不行嘅拍片功能，可以拍到唔同效果，其中最好玩係可以拍攝StopMotion嘅《iMotionHD》，用iPhone4就可以自製一部逐格動畫，相當有趣。
記者：許福合
攝影：楊錦文
Model：Eagle@PureModels
1.自拍StopMotion
StopMotion是一種非常有趣嘅拍攝手法，原理是將多個連續靜止畫面，串連起來播放，視覺上就形成連串動作，讓毛公仔等死物都可動起來。製作上其實毋須花大錢買器材，只需一部iPhone加埋《iMotionHD》就得！
App介面簡約整潔，最重要係設定Time-Laps，代表拍攝間隔，如想拍攝公仔自行郁動影片，起碼須設定3秒以上間隔，聽到提示聲音就可以做下個動作，直至拍攝到足夠鏡頭為止。完成後會將所有畫面連接起來，一段StopMotion便大功告成。雖受硬件所限，只能錄製1,280×720，但在朋友間過吓癮、放上YouTube、fb，其實夠晒玩了。
《iMotionHD》
（iOS，免費）
2.扮八米釐復古
好多攝影玩家喜歡懷舊濾鏡，連拍攝復古短片一樣咁有味道。《Super8》可將iPhone變成復古級的八米釐攝錄機，加上「雜訊」，令影片看來更有歷史。亦可加上黑邊、漏光及震動等效果，若環鏡太暗，仲可以長開閃光燈補光，幫助拍攝。在畫面往右拉，仲可以「反轉」這部八米釐，轉到正面拉動鏡頭就可以換鏡，介面真係好有心思！
《Super8》
（iOS，0.99美金）
3.特效場面任你換
若想簡單地玩濾鏡拍片，就要試用這款《Cartoonatic》，內置9種特效影片濾鏡，而且攝錄時仲可以即時預覽效果。介面設計簡單易用，只須用手指在畫面向左或右拉，就可轉換濾鏡，即使攝錄中途都可轉換，一段影片可以讓你狂換濾鏡拍攝。特效之中，筆者最喜歡素描及粗粒效果，感覺如漫畫一樣。完成後仲可直接Upload上網，齊齊分享。
《Cartoonatic》
（iOS，免費）
4.底片濾鏡任揀
論拍攝可調校性，《CineCam》是相當彈性的App，分別可以選擇鏡頭、底片及濾鏡，不過一開始，會發覺選項內都是空的，原來，鏡頭、底片及濾鏡都要從商店內購買，而App本身會附送3,000點，可以按自己喜好換購，當然，唔夠用就要付錢了。
《CineCam》
（iOS，免費）
5.微縮攝影
DC界大熱Tilt-Shift微縮效果濾鏡，呢款App就同樣可將景物拍成模型玩具一樣，不過變成更好玩嘅短片！一開始選擇好鏡頭範圍，再按喜好調整飽和及模糊效果，就可以開始拍攝。App本身係免費，畀多1.99美金，就可玩埋720P及黑角等功能。
《Tilt-ShiftTime-LapseVideos》
（iOS，免費）