地球好危險！手機、相機一街係咁影，「有心人」多得呢股影相風，幫佢哋做晒掩護，隨街玩偷拍，無法無天。女士們可有諗過用防偷拍產品？一機傍身反守為攻，咪再任人魚肉。
記者：朱崇德
攝影：蔡家輝
Model：Hazel&Dominic@GME
有聲有畫追線器
現時一般防偷拍偵測工具主要針對無線CAM，事關有線CAM行內人比喻為「無色無味」，完全無Signal難以察覺。手揸呢部台灣製WCH-200X就人人可以做偵探，代理話好多私家偵探都用佢。簡單講，佢係個「無線CAM追線器」，兩條天線覆蓋1.2及2.4GHz民用頻譜，唔理你任何鬼祟渠道買嚟嘅無線偷拍CAM都難逃佢法眼！用法似電視機追台，一開機就會自動Scan附近有無偷拍CAM，Scan到的話，機面2.5吋彩色芒會即時直播偷拍CAM所拍到嘅畫面。小記喺鴨寮街測試，就Scan到有無線CAM喺二樓影TopShot！用家可跟住畫面順藤摸瓜拆咗個CAM，仲有聲畫輸出，錄底畫面有證有據唔告到狂徒甩肺。
眼紅紅搵有線針孔
有線CAM真係捉佢唔到？又未必！呢件LensFinder&WirelessCameraDetector，開動機面四盞紅外線射燈，再透過機身紅色膠片睇，有鏡頭嘅位置會變成反光白點，不論環境幾暗一樣無所遁形。機身亦有無線偷拍CAM訊號偵察，四盞綠燈做標示，訊號越強着燈越多。
揭穿蠱惑招
所謂知己知彼，要防範偷拍狂，就要知對方點出蠱惑！無線偷拍鏡頭可偽裝成各種普通不過嘅日用品，勁過「凌凌漆」隻風筒鞋同太陽能電筒。
扮藍芽咪：
專家指近期興起扮藍芽咪偷拍CAM，Clip喺心口，專拍「事業線」，女士小心！
扮螺絲衫鈕：
呢隻細細隻嘅，鏡頭位細過一毫子，可以Fit上螺絲、衫鈕，令人唔易察覺。
專捉網絡 監視鏡頭
據Sales稱，呢隻機係做GYM及游水靚太最愛。佢唔似上面兩款，唔可以憑訊號大細主動追查偷拍CAM方位，勝在一Scan到有偷拍CAM就會着燈兼大叫，起碼可以即時鬆人，唔使蝕底咗都唔知。另外佢仲有個Wi-Fi偵測設計，針對Wi-Fi類「網絡監視鏡頭」，即係人在公司，用電腦監察屋企BB嗰隻鏡頭，市面同類產品好少有呢樣功能。
平價版紅眼睛傍身
RF/LensDetector就齋玩紅外線搵鏡頭，機價即時低至$250。佢嘅紅外線照射燈增至6粒，火數高、照射範圍更遠更強。據Sales講，好多後生仔女去廉價度假屋或國內不知名酒店時必定買佢傍身，以防萬一啫。
偷拍CAM 隔空搜身
RFBugDetector喺鴨寮街出晒名，每逢會展有珠寶或鐘錶展都會成為展商搶手貨！須知展商最怕俾人偷拍抄款，呢部機細如掌心雷，可偵測無線CAM訊號，再發出「嘟嘟聲」嘅強弱脈衝訊號，越近偷拍CAM越響，而且可透過耳筒收聽，揸住佢就可以好似G4一樣不動聲色「隔空搜身」。
a.華輝（31820888）
b.409SHOP（27200409）