之前喺楊思琦同李泳豪感情瓜葛中好多料爆嘅李泳漢，忽然加入黃毓民「人民力量」，又忽然話出選區議會角逐九龍城黃埔西議席，言行真係令人估佢唔到；不過更估佢唔到嘅，係佢竟然「甩底」，最終冇報名選議員。
高登巴打噚日爆料，指李泳漢攞唔到10個提名，所以臨門撻Q，好可惜咁話。八方問「人民力量」主席劉翁，為乜李泳漢話嫁又唔嫁？10個提名都攞唔到？早響嘛，八方都可以幫吓手喎。劉翁話高登巴打今次爆錯料，提名早就夠數，不過李泳漢話媽媽施明近日抱恙，佢想多啲時間照顧媽媽，所以唔選。李泳漢咁孝順，冇理由強人所難，今屆唔玩，四年後仲有機會。