家陣NBA勞資談判無起色，今季有冇得打都成問題。你哋唔打唔緊要，我自己上陣！全新《NBA2K12》，將大受歡迎嘅「佐敦模式」進化成「NBA'sGreatest」，大玩懷舊經典戰，發佈會更請嚟「跛Co」黃宗澤撐場，表演入樽助興！
記者：韓繼聰
攝影：楊錦文
15殿堂高手復出
為增聲勢，SCEH專誠搵嚟人氣奸仔「跛Co」黃宗澤，聯同靚女Evelyn及兩大港隊高手，喺海港城LCX同場較技。雖然大家打得有點Hea，但勝在氣氛一流，而且主角始終係《NBA2K12》。講番隻Game，上集嘅「佐敦模式」令一眾機友沉迷狂煲，為儲齊AirJordan，打得不亦樂乎。咁好反應當然要繼續，今集嘅「NBA'sGreatest」追加至15個殿堂級人馬，包括MagicJohnson、LarryBird、Dr.J等！遊戲仲提供大量退役球星資料，老球迷可懷舊重溫，新一代亦可認識NBA嘅經典時代。復古復到底，遊戲畫面會根據所屬時代，變成黑白或適量舊化，就連球場、場邊廣告牌亦有不同。甚至連旁述都做到Mono嘅特殊效果，簡直好似睇番舊比賽嘅錄影帶咁，場場大戰重溫經典，過癮！
除大玩懷舊之外，操控當然都有新嘢！將射波掣移至右邊Analog掣，向下係蹲低、向上就起跳出手，廠方稱之為TotalShotStickControl。開頭玩真係有啲唔慣，但玩落一個「冬菇頭」控制所有進攻動作，節奏感幾好喎。另外，玩開《NBA2K》系列嘅，可能覺得籃底進攻有啲困難亦唔夠真實，今集就新加PostGameSystem，後退步、背籃功等令籃底進攻更多變化，更具威力！
另一種玩法係創作個人角色，將自己代入NBA世界，除完成任務可賺分買動作、裝備、能力外，有時同隊友唔啱Key，更可以請佢哋食飯，增加合作度，生活同打機一樣咁現實。
《NBA2K12》
機種：PS3、XB360
售價：
$399（PS3版）
$449（XB360版）
$658（PSMove套裝）
$2,479（PS3160GB套裝）
$2,629（PS3320GB套裝）
