醜婦終須見家翁，裝修甩甩漏漏嘅立法會大樓，噚日正式開放畀記者參觀，由秘書長吳文華充當「導遊」，「景點」包括會議廳、記者室、示威區等，要執漏嘅辦公室冇份。
初遊新大樓，記者嘩嘩聲，尤其係入到攝影室，因為玻璃太暗，又禁止用閃燈，根本不能透過玻璃影相。攝記即時投訴，吳文華從善如流，話會搣咗塊玻璃保護膜，及將雙層玻璃變單層，並加強會議廳照明，方便拍攝，攝記初步收貨。
新大樓多咗地方擺藝術品，有幅顧媚作品，大會議廳有竹葉紋裝飾，幾清雅，冇咁單調；宴會廳牆上有蝴蝶掛飾，不落俗套。
公眾日後可到新大樓參觀，有個歷史長廊同教育廊，展示香港立法機關歷史，有介紹開埠第一條立嘅法例，亦有歷年大事記，05年大事係否決政改方案，最得意係有得影貼紙相，以示到此一遊。門外示威區範圍可大可小，人多可擴大，反之可縮細。唔怕你癡，唔怕你呆，最怕你不來。