香港著名編劇家杜國威，半生醉心舞台編劇，65歲的他，一支筆寫盡戲如人生，他可以是名歌女姚小蝶，又是賣遮佬梁蘇，是才子和儍佬十三郎，又是妓女杜十娘。杜國威30年舞台編劇生涯中，編寫過無數的角色，代入很多錯綜複雜的感情關係，這一切最終成就了杜國威的舞台人生。 撰文：楊潔雯
杜國威溫文爾雅，時而風趣幽默，突然又會瘋瘋癲癲。說話時，慣性將右手搭住左手平放胸前，講到興起，手指會左點右點。由舞台劇講到政治，又談到生老病死，他的情緒好似過山車一樣，開心時咯咯大笑，傷心時沉默是金，嬲的時候，脹紅的臉像極一隻憤怒鳥，杜國威的戲，好好睇。
寫盡人間真善美
新世代，還有人不懂得用電腦？杜國威堅持這一世只可以跟筆合作，所以劇迷示愛千祈不要電郵給他，否則你的愛只會石沉大海，杜sir笑說：「我都知時代唔同，家年輕人寫嘅詞語，我都唔識寫，你叫我寫冏樣，人哋都會覺得嘔喇！」只要人間有情，杜國威筆下的故事，是可以劃破時空，他說：「我呢啲人買少見少，不過都仲有啲人會懷念我，所以仲有人搵我做嘢，嚟緊高生（高志森）搵我再做《Miss杜十娘》！」
刻骨銘心的愛情，有情有義的真摯友情和親情，杜sir寫過，還經歷過，對人性觸覺敏銳的他，又怎樣剖析自己的感情世界，他說：「今年65喇！好多人對我好好，不過好多人以為只要兩個人死纏爛打，吓你，錫吓你，地鐵幫你霸位，叫聲豬豬，你坐喇，唔諗人㗎！我唔係呢個年代。」杜sir強調的，是大愛，在他所有著作中，都有提過，他續說：「愛情！每個階段都唔同，細個信地久天長，然後好多嘢老咗，所講嘅地久天長係喺心入面，有好多人你會永遠記住；無緣嘅，你望一眼連朋友都冇得做，所以有啲人好識得回憶，只會回憶同你最好嘅嘢。」相信杜sir都是一樣，他的回憶總是美好。
藏盡Fans心中情
訪問中，杜sir多次提起粵劇名伶梁漢威，率性的杜sir難掩傷感之情，強忍着淚水說：「我係幾感觸，威哥係一個好人，好識為人着想，好多時我請班後生食飯，因為佢哋收入唔多，威哥有時會等埋我哋，因佢覺得唔好成日要杜sir出囉，有一個咁有情有義嘅人，係咪仲好過愛情呢？」65歲杜sir多番強調自己不是這個年代的人，老朋友先後離逝，他說：「一個一個死咯！好似威哥（梁漢威）咁！我家都冇乜打麻雀，啲腳買少見少。」
杜sir對死後的一切，不感興趣，他活在當下，敬請所有人要生前待他好，不要在死後表揚他。杜sir又感嘆世事無常，除了繼續創作更多精采的劇目，他計劃在生前或死後，完成一個小小的宏願，他想了一想，像要跟律師立遺囑一樣說：「我想喺70歲……如果我真係有命，我會將床底嗰4箱……係呢30年來fans寄畀我嘅信，一次過寄番畀佢哋，喺上面寫少少嘢，如果我死咗做唔到，就叫啲徒弟做，我諗班fans會好感動。」杜sir，何止感動，簡直是催淚。
肯認錯 春風化雨
地球是由西向東轉，你知不知？踩入話劇界前，杜sir教了十年地理，他說：「我睇電視，成日見到廣告個地球由東向西轉，家連基本嘢都有問題，點樣講教育呀！」推己及人，杜sir做老師時頓悟到，一個人，一個社會，一個政府，只懂「死撐」是冇用的，他說：「我當年唔係一個好有學歷嘅老師，不過班學生好鍾意我，話我個人『真』，我叻在肯喺班房認錯，我寫錯咗嘢第二日會喺堂度saysorry，嗰班衰嘢噓我㗎，咁我咪話『唔通要我跪喺度認錯？』成班人笑到肚痛，學生就係鍾意咁，所以唔好死撐！」