最美麗港姐朱玲玲打骰、位於中環畢打行嘅食肆ChinaTeeClub，開業25年，噚日光榮結業；改作羅家婦嘅朱玲玲，今日起正式撤離霍家持有嘅畢打行，讓路畀美國潮牌Abercrombie&Fitch（A&F）。
會員逾半係老外
ChinaTeeClub噚日搞farewellparty，好多人到場，朱玲玲同兩位有份管理嘅家姐一齊現身。據朱玲玲講，當年霍家喺中山搞高球場，霍震霆想班波友喺香港有個地方聚腳，所以喺畢打行開咗呢個ChinaTeeClub，此Tee亦不同彼Tea，Tee係高球發球個球座，唔係hightea個tea，連招牌都係兩支高球棍組成。
呢間Club入會費1,000蚊，約有2,500個會員，聽聞逾半係老外，畢打行有逾80年歷史，係二級歷史建築；為配合建築風格，裝修好懷舊，燈飾、吊扇、梳化、留聲機、地板，好有古典味。食物方面，台柱係喇沙同海南雞飯，印尼炒飯亦好受歡迎，唔book冇得食，消費以中環計好理性，一般幾百蚊埋單，幾千蚊都有，比較少。
周星馳租場拍戲
名人食肆多名人幫襯，前高官陳太、已故嘅哥哥張國榮係常客，曹仁超、劉德華不時嚟，周星馳曾租場拍戲。朱玲玲話唔會另覓新舖位重開，因為搵唔番類似歷史建築物開懷舊feel嘅Club，加上一把年紀，唔想再操勞。呢點八方理解，既然搵到新天地，何需留戀舊建築？
畢打行多間舖頭會陸續離場，因為港人追捧嘅美國潮牌A&F以月租700萬元，租下地庫、地面一至四樓全層，總共逾3.2萬平方呎，TeeClub搬走後，遲啲輪到上海灘，八方知道有外國籍會員曾去信A&F求情，希望TeeClub有得留低，以為老外同聲同氣有偈傾，點知都係無功而還。A&F愛聘請年輕貌美、身材好嘅鬼仔鬼妹做售貨員，歷史建築新氣象，應該甚有睇頭。
難忘招牌菜
mailto:[email protected]