隔牆有耳：港大頒院士風雨不改 - 李八方

風球之下，香港大學名譽大學院士頒授典禮風雨不改，事關得獎人同嘉賓個個貴人事忙，有啲更係遠道而來，改期冇下次。
今年有10人獲殊榮，包括養和醫院組織病理細胞學主任侯勵存醫生，佢父親侯寶璋係港大教授，二哥健存05年亦獲頒榮譽院士，兩代人與港大淵源深，等於自己家庭一樣。

研究兼具人生哲理

82歲嘅侯醫生依然積極教學生同做科學研究，目前致力研究幹細胞，搞呢科緣於一個夢，夢中見到好多小朋友喺度玩，班小朋友話自己係幹細胞，你想我做乜就做乜。呢段夢境令佢聯想起幹細胞可以按人體需要，發展成肌肉同神經。科學需要創意，侯醫生嘅研究兼具人生哲理，佢同八方講，為人處世，好似人體內細胞咁，都係你幫我、我幫你先活得下去。
另一個獲名譽大學院士銜嘅行政會議成員胡紅玉，被問到唐唐同CY嘅特首選情時，話未決定到邊位係最好人選，但係歡迎有競爭，又話自己唔係選委，希望將來有投票選特首呢一日。