巴塞美斯是否好波過皇馬C朗，講腳法與靈活，左丁山投美斯一票，但美斯之表現特別出色，與佢嘅日夕相對十幾年，自細一齊踢波踢到大嘅巴塞隊友有啲關係。C朗就似一位天山劍客，下山後憑一己之力，踢出名堂，佢嘅皇馬隊友雖然亦係粒粒皆星，但在整體合作與默契方面，難與巴塞相比。
C朗天生出嚟，就係一位運動明星，而美斯幼時，患上疑似「侏儒」病症，好彩巴塞係伯樂，自細收留佢，不斷餵以特效藥，先至可以重塑美斯。而C朗贏晒先天。一間汽車用品公司CastrolEDGE以重金請C朗拍一個電視廣告紀錄片，用科學儀器與科學方法測試C朗體能、技能、自然反應，得出嘅結論係C朗係上帝傑作，無人能及。
嗱，C朗身高六呎一吋，有英俊明星面龐，上身強壯似中量級拳手，雙腿修長似羚羊，短跑速度飛快，同時瘦得似肯亞長跑選手，單睇身形外表，已非凡品，以高速相機拍攝C朗嘅足部動作，發現佢在八秒之內，有十三次移動、跨步及旋轉，足令任何後衞睇到頭昏眼花；C朗戴上紅外線眼球追蹤器，研究人員發現C朗唔係望住個波嘅，而係不停咁望住防守後衞雙腳，腦筋不斷轉彎。佢射球速度係時速一百三十公里，勁度足以射穿玻璃門。又有一個測試，一個球員A向球員B傳球，球員B係業餘足球好手，球員A一踢波，室內燈光即時熄滅，球員B無論用頭或腳去接波，都與個波相距一碼，完全撲空。但C朗呢？黑暗中連續三次都可以接應傳球射波入球門！
以咁好嘅天賦條件，C朗拿度完全壓倒大哨朗拿度，可惜吖，正是既生瑜何生亮，偏偏在同一時期，同一西甲聯賽，巴塞有一個美斯，令C朗暫時無法做到世界足球先生，你話足球有單對單，單打獨鬥嘅話，C朗梗係有資格贏美斯啦，但足球係羣體遊戲，巴塞足球學校至到巴塞球會，係一個人為制度，制度可以源源不絕咁培養新秀，但C朗係天才，天才難以複製呢。上述資料係名記者RobHughes報導嘅，令左丁山好渴望可以睇到呢套CastrolEDGEPresentsRonaldoTestedtotheLimit紀錄片。至於會唔會在香港播出，唔知噃。