蠱惑仔唔難搞，最難搞係領正牌嘅蠱惑仔，呢次曼城罷踢風波，文仙尼屬於有牌，泰維斯就屬於無牌。結果呢？泰仔罰停賽兩周，文仔嘅輸波責任卻無人追究。
吹水擦鞋就叻
文仔當日除咗同泰仔炒大鑊，亦同波斯尼亞前鋒迪斯高面左左。當時拜仁領先2:0，文仔用防中尼祖迪莊入替迪斯高，佢解釋係唔想落後到0:3喎！咁點解唔一開波就打901，咁咪冇咁易輸波囉。
文仔係蠱惑仔之中嘅極品──姑爺仔，吹水擦鞋最叻，開片就例肚屙。上場歐聯分組賽贏唔到拿玻里，文仔賽後大口氣話下場一定要贏拜仁，結果啃完兩隻光蛋，飽咗，仲搵埋泰仔做替死鬼。
外界都覺得曼城係球星嘅天堂，其實領隊先至係皇帝。當年曉士同頭號球星羅賓奴唔妥，結局係成個巴西幫被鏟走。今次泰仔同文仔嘅衝突，中東老闆蒙蘇同樣企喺文仔呢邊。
試諗吓蒙蘇對文仔有求必應，要邊個買邊個，文仔之前仲話唔夠中場，要買埋迪羅斯。學似文仔咁樣領軍，相信40人都未必夠用。好領隊嘅基本條件係維持球隊和諧，呢方面文仔喺國米已經肥過佬。
有牌蠱惑仔可以整垮一隊波，當佢「升呢」成一區之長，分分鐘賣人民落火坑，CY梁就屬於呢隻啦。不過同事牽牛講過玩政治，奸仔總好過白痴仔；不過計我話都一樣，分別在於我被出賣嘅係民主自由，定荷包嘅啫！
文：法比奧